धनगढी — कैलाली कारागारका एक थुनुवाको मृत्यु भएको छ । कैलालीको टीकापुर नगरपालिका–४ का ५६ वर्षीय रामकिसन चौधरीको सोमबार मृत्यु भएको हो । जिल्ला प्रहरी कार्यालय कैलालीका प्रवक्ता राजकुमार सिंहका अनुसार स्वास्थ्यमा समस्या भएपछि चौधरीलाई २ बजे सेती प्रादेशिक अस्पताल पुगाइएको थियो । 

अस्पताल पुर्‍याएलगत्तै चिकित्सकले चौधरीलाई मृत घोषणा गरेका थिए । चौधरीलाई साउन २९ गते जबरजस्तीकरणी मुद्दामा पुर्पक्षका लागि कारागार चलान गरिएको थियो । पछिल्लो दुई महिनाको अवधिमा कैलाली कारागारका चौधरीसहित तीन जना कैदीबन्दीको मृत्यु भइसकेको छ ।

यसअघि बैंकिङ कसुरमा दोषी ठहर भएर कैलाली कारागारमा सजाय भुक्तान गरिरहेका डडेल्धुराको भागेश्वर गाउँपालिका ५ का २८ वर्षीय हरिसिंह पालीको असार २ गते शंकास्पद मृत्यु भएको थियो । यस्तै साउन २३ गते राति कैदीबन्दीबीच भएको हिंसात्मक झडपमा धनगढी उपमहानगरपालिका ४ का भरत चौधरीको मृत्यु भएको थियो ।

घाइतेहरूलाई कारागारमा पुनःस्थापना गर्न कठिन

एक जना कैदीबन्दीको मृत्यु हुनेगरी साउन २३ राती कैलाली कारागारमा भएको हिंसात्मक घटनामा घाइते भएका ४८ जना ३८ जनालाई कैलाली कारागार प्रशासनले कैलाली कारागारमा पुनःस्थापना गर्न सकेको छैन । उनीहरूलाई डिस्चार्जपछि पनि सेती प्रादेशिक अस्पतालमै राखिएको छ ।