बैतडी — बैतडीका स्थानीय तहले भू–उपयोग क्षेत्र वर्गीकरण नगर्दा जमिनको कित्ताकाट रोकिएको छ । स्थानीय तहहरूले २०८२ असार मसान्तभित्र भू–उपयोग क्षेत्र नक्सा तथा विवरण अद्यावधिक गरेर नापी कार्यालयमा जानकारी गराउनुपर्नेमा त्यसो नगरेका कारण कित्ताकाट रोकिएको हो ।

दोगडाकेदार गाउँपालिकाबाहेक यहाँका ९ वटा स्थानीय तहले भू–उपयोग क्षेत्र वर्गीकरण नगरेको नापी कार्यालय बैतडीका प्रमुख रणसिंह रावलले बताए । ‘दोगडाकेदार गाउँपालिकाले मात्रै भू–उपयोग क्षेत्र वर्गीकरण गरेको रिपोर्ट कार्यालयमा बुझाएको छ,’ उनले भने, ‘रिपोर्ट नबुझाउँदा साउन १ बाट अरु पालिकाको कित्ताकाट रोकिएको छ ।’ 

भू–उपयोग नियमावली, २०७९ को नियम ५ बमोजिम स्थानीय तहको भू–उपयोग परिषदले भू–उपयोग ऐन २०७६ बमोजिम भू–उपयोग क्षेत्रको वर्गीकरण गर्नुपर्ने हुन्छ ।