धनगढी — सुदूरपश्चिममा यो वर्ष जनवरीदेखि सोमबारसम्म ३३ जनामा कोरोना संक्रमण देखिएको छ । जसमध्ये ३१ जना स्वस्थ भइसकेकाहरु छन् भने २ जना ७ दिनसम्म रहने सक्रिय संक्रमणको अवस्थामा छन् ।
प्रादेशिक स्वास्थ्य आपतकालीन कार्य सञ्चालन केन्द्रले भारतमा कोरोना संक्रमण देखा पर्न थालेपछि प्रदेशका विभिन्न जिल्ला सीमानाकामा रहेका हेल्थ डेस्कमा नेपाल भित्रिने शंकास्पद व्यक्तिहरुको स्वास्थ्य परीक्षणलाई विशेष प्राथमिकता राखिएको जनाएको छ । प्रदेशमा यसअघि नै कोरोना महामारीका बखत सीमानाकामा हेल्थ डेस्क सञ्चालनमा रहँदै आएका थिए ।
कैलालीमा धनगढीको त्रिनगर र खक्रौला, कञ्चनपुरको गड्डाचौकी, बैतडीको झुलाघाट र दार्चुलाको पुलघाट र जोलजिवी नाकामा रहेका हेल्थ डेस्कमा कोरोनालगायत संक्रमित रोगहरुको परीक्षण हुने गरेको छ । हालका दिनमा सबैभन्दा बढी कोरोना संक्रमितहरु धनगढीको त्रिनगर नाका भएर भित्रिएका हुन् ।
त्रिनगर नाकास्थित हेल्थ डेस्कको तथ्यांकअनुसार जेठ २१ देखि असार २२ सम्म एन्टीजेन परीक्षण गरिएका ४२९ शंकास्पद व्यक्तिहरुमध्ये २४ पुरुष र ७ महिलासमेत ३१ जना कोरोना संक्रमित देखिएका हुन् । बाँकी २ जना कञ्चनपुरको गड्डाचौकी नाकामा भेटिएको हेल्थ डेस्कका स्वास्थ्यकर्मी विशाल भट्टले बताए ।
त्रिनगर नाकाको हेल्थ डेस्क इन्चार्ज गणेश साउदका अनुसार भारतबाट विभिन्न सहरबाट घर फर्कनेहरुमध्ये ज्वरो आएका र रुघाखोकीको स्वास्थ्य समस्या देखिएका शंकास्पद व्यक्तिहरुको मात्र हाल परीक्षण भइरहेको छ । सुरुमा परीक्षण किटको अभाव भइरहेकोमा हाल सबै हेल्थ डेस्कमा परीक्षण नरुक्ने गरी किट उपलब्ध भएको डेस्कका स्वास्थ्यकर्मीहरु बताउँछन् ।
सुदूरपश्चिम प्रदेशको प्रादेशिक स्वास्थ्य आपतकालीन कार्य सञ्चालन केन्द्रले कोरोना, डेंगी लगायतका रोगको संक्रमणको अवस्था, औषधि र परीक्षण किटको आपूर्ति र स्वास्थ्यकर्मीहरुको खटनपटन तथा व्यवस्थापन गर्दै आएको छ । उक्त केन्द्रका महामारी विपद सम्पर्क व्यक्ति हेमराज जोशीका अनुसार कोरोना परीक्षणका लागि आवश्यक पर्ने किटहरु केन्द्रीय आपूर्ति महाशाखा र प्रदेशको स्वास्थय आपुर्ति महाशाखाबाट समेत प्राप्त भइरहेको बताए । उनले हाल फाट्टफुट्ट अवस्थामा कोरोना देखा परेको छ । तर डेंगी भने सुदूरपश्चिमका प्राय: सबै जिल्लामा फैलिएकोले रोकथामका लागि अझ बढी सावधानी अपनाउनु पर्ने अवस्था रहेको बताए ।
सुदूरपश्चिम प्रदेशका प्राय: सबै जिल्लामा गत जनवरीदेखि हालसम्म १६७ जनामा डेंगी पोजिटिभ देखिएको छ । स्वास्थ्य आपतकालीन कार्य सञ्चालन केन्द्रको सोमबारको दैनिक बुलेटिनमा उल्लेख भएअनुसार प्रदेशको पहाडी जिल्ला डडेलधुरामा सबैभन्दा बढी डेंगु संक्रमणका केस देखिएको छ ।
यस्तै प्रदेशको कैलालीमा ३१, कञ्चनपुरमा २९, डोटीमा २५, अछाममा २४, बझाङमा ११ र दार्चुलामा २ डेंगीका संक्रमित देखिएको बेन्द्रको बुलेटिनमा उल्लेख छ । केन्द्रका महामारी विपद सम्पर्क व्यक्ति जोशीका अनुसार डेंगी संक्रमण फैलिन गर्मी र वर्षाको प्रतिकूल मौसमका कारण संक्रमणको जोखिम बढ्ने खतरा रहेको छ । डेंगी रोकथामका लागि सरकारी निकायबाट हुने तयारीसँगै नागरिक तह र स्थानीय निकाय तथा सम्बन्धित स्वास्थ्यसम्बन्धी संघसंस्थाबाट समेत लामखुट्टे नियन्त्रणमा समेत जनचेतना बढाउने कार्यक्रम सञ्चालनमा जोड दिनु पर्ने जोशी बताउँछन् ।
