डोटी — डोटीको सायल गाउँपालिका-३, तोलेनीमा पहिलो पटक विद्युत सेवा पुगेको छ। जिल्लाको विकट उक्त पालिकामा विद्युत् सेवा बिस्तार भएपछि स्थानीयहरू अब उज्यालोमा बस्न पाउने भएका छन्।
गाउँमा बिजुली पुगेपछि स्थानीयवासीमा खुसीयाली छाएको छ। गाउँमा पहिलो पटक बिजुली बलेसँगै यहाँका स्थानीयवासीहरूको खुसीको सिमानै पार गरेको स्थानीयहरू बताउँछन्।
स्थानीय यदु नेपालीले विद्युत् विस्तारले ग्रामीण जीवनशैलीमा ठुलो परिवर्तन ल्याउने विश्वास व्यक्त गर्दै लामो समयपछि गाउँमा केन्द्रीय लाइनको बिजुली पुगेपछि निकै खुसी लागेको बताए । नेपालीले भने , 'हामी कुटानी पिसानी गर्नाका लागि घण्टौँ पैदल हिँडेर जानुपर्ने अवस्था थियो। अब गाउँमा बिजुली आयो, अब गाउँमै कुटानी पिसानी मिल सञ्चालनमा आउँछ भन्ने लागेको छ।'
त्यस्तै, कक्षा १० मा अध्ययनरत छात्र मेखराज उपाध्यायले बिगतका दिनहरुमा बत्ती नहुँदा पठनपाठनमा निकै समस्या खेप्नु परेको भन्दै गाउँमा केन्द्रीय लाइनको बिधुत सेवा पुगेपछि सबैभन्दा बढी विद्यार्थीहरुलाई राहत मिल्ने बताए ।विद्युतको उद्घाटन सायल गाउँपालिकाका अध्यक्ष धर्मराज जोशीले विधिवत रूपमा बत्ती बालेर उद्घाटन गरेका हुन्।
अध्यक्ष जोशीले अब वडा नं. ३ का गर्खा सायल, बनगाउँ, पानीखालका स्थानीय केन्द्रीय विद्युत् प्रशारणको लाइनसँग जोडीएका बताए । उनले २०७७/०७८ मा जडान गरि सक्नु पर्ने बत्ती विभिन्न कारणले रोकिएकोले आफ्नो र कर्मचाहरीहरूको अथक मेहिनेतले विद्युत सेवा विस्तार गर्न सफल भएको बताए ।
अब स्थानीय, व्यापारी, व्यवसायीलाई सहज भएको र विद्यार्थीलाई अँध्यारोमा पढ्न लेख्नबाट वञ्चित हुनुपर्ने स्थितिको अन्त्य भएको उनको भनाइ छ।
