कञ्चनपुर — भारतमा कोरोना संक्रमण दिन प्रतिनदिन बढ्दै गएको छ । त्यसको जोखिम नेपालमा पनि बढ्दै गएको छ । तर पनि नाकामा सामान्य जाँच तथा परीक्षण लगायतका गतिविधि हुन सकेका छैनन् ।

बुधबार कैलालीको गौरीफन्टा नाका भएर घर फर्किन लागेका ३ जनामा कोरोना संक्रमण पुष्टि भएको छ । उनीहरु सबै भारतको दिल्लीबाट घर फर्किएका हुन् । यसलेसमेत जाखिम झनै बढ्दै गएको देखाउँछ । 

कञ्चनपुरको गड्डाचौकी नाकामा एन्टिजेन किटकै अभाव छ । यहाँ अहिलेसम्म परीक्षणको काम हुन सकेको छैन । ‘एन्टिजेन किट प्राप्त भएको छैन, किन्नका लागि बजारमा पनि अभाव छ,’ जिल्ला स्वास्थ्य कार्यालय कञ्चनपुरका कोभिड फोकल पर्सन सिद्धराज भट्टले भने, ‘तत्काल नाकामा कसरी काम गर्ने भनेर माथिल्लो तहबाट कुनै निर्देशन पनि भएको छैन ।’