अछाम — नेकपा एमालेका पूर्वउपाध्यक्ष भीम रावल पार्टीमा रहने या नरहने भन्ने विवादले करिब डेढ वर्ष पछाडि धकेलिएको एमालेको अछाम जिल्ला अधिवेशन शनिबार हुने निश्चित भएको छ । यतिखेर अछामका ९१ वटै वडा र विभिन्न क्लस्टरबाट आएका प्रतिनिधिको सदरमुकाममा चहलपहल बढिरहेको छ । 

रावललाई पार्टीबाट निकालेपछि उनी कित्ताका नेता-कार्यकर्ता पनि मातृभूमि जागरण अभियानसँग जोडिएका छन् । रावल निकट एमालेका नेता-कार्यकर्ताको ‘कित्ताकाट’ भएपछि जिल्ला अधिवेशन हुन लागेको हो । एमाले र रावलबीचको द्वन्द्व लामो समयसम्म चलिरहँदा जिल्लास्थित धेरै नेता-कार्यकर्ता अन्योलमा रहेका थिए ।

नेकपा फुटपछि तत्कालीन एमालेका धेरै नेता एकीकृत समाजवादीमा जाँदा नै क्षति बेहोरिहेको अछाम एमाले यतिबेला थप संकटमा छ । विषेशगरी रावलको निर्वाचन क्षेत्र नम्बर १ मा एमालेको नेतृत्व गर्नेहरु नै फरकधारमा उभिएपछि एमाललेलाई झट्का लागेको छ । उसो त अछाम एमालेले नेकपा फुटपछि नै ठूलो क्षति बेहोर्नुपर्‍यो । एमालेका पूर्व जिल्ला अध्यक्ष एवं सांसद शेरबहादुर कुँवर, साँफेबगर नगरपालिकाका पूर्व नगरप्रमुख एवं तत्कालीन एमालेका प्रभावशाली नेता कुलबहादुर कुँवरलगायत माधव नेपाल नेतृत्वको नेकपा समाजवादीमा जाँदा अछाम क्षेत्र नम्बर १ ले नै क्षति बेहोर्नुपरेको थियो ।

सुदूरपश्चिम प्रदेश कमिटी सदस्य दूधकला विष्ट, एमालेका प्रभावशाली नेता प्रकाश शाह, बालगिरी कुँवर लगायतका नेता सयौं नेता-कार्यकतालाई लिएर अहिले रावलको मातृभूमि जागरण अभियानमा जोडिएका छन् ।

यसअघि नै नेकपा समाजवादीमा एमालेका थुप्रै नेता-कार्यकर्ता गइसकेकाले विवाद नहुने गरी सर्वसम्मत नेतृत्व चयनका लागि नेताहरुले प्रयास गरिरहेका छन् । तीन भागमा टुक्रिएको एमाले अछामलाई बलियो बनाउनका लागि सर्वसम्मत नेतृत्व चयन गर्नैपर्ने दबाबमा नेताहरु छन् । तर सर्वसम्मतको नाममा नेताका निकटका मान्छे मात्रै अटाउने अवस्था आएमा रुष्ट नेता-कार्यकर्ता भीम रावलतिर जान सक्ने डर पनि एमाले नेतृत्वलाई छ । अछाम इन्चार्ज झपट बोहरा, यज्ञ बोगटी र कमल तिमिल्सैना गरी तीन जना केन्द्रीय सदस्य सर्वसम्मत नेतृत्व चयनका लागि तयारी गरिरहेका छन् ।

प्रदेश र प्रतिनिधिसभाको निर्वाचन २०७४ मा अछामका दुईवटै निर्वाचन क्षेत्रमा विजयी भएको एमाले २०७९ को चुनावमा दुवैमा पराजित भयो । गिराएको साख जोगाउन पनि एमाले अछाम कसरतमा छ । क्षेत्र नम्बर १ बाट प्रतिनिधिसभा सदस्यको उम्मेदवारका लागि जिल्लाबाट रावलको नाम एकल सिफारिस भएपनि एमाले अध्यक्ष केपी शर्मा ओलीले आफू निकटकालाई उम्मेदवार बनाएपछि जिल्लामा लामो समयसम्म एमाले एकजुट हुन सकेको थिएन ।

नेतृत्वमा रस्साकस्सी
अप्ठ्यारो परिस्थितिबाट गुज्रिरहेको एमाले अछाम नेतृत्व चयनमा रस्साकस्सी चलिरहेको छ । शनिबार हुने अधिवेशन उद्घाटनका लागि केन्द्रीय सचिव एवं सुदूरपश्चिम इन्चार्ज लेखराज भट्ट अछाम आइपुगेका छन् । नेकपा फुटपछिको पहिलो एमाले अधिवेशनबाट जिल्ला अध्यक्षमा निर्वाचित भएका चन्द्र बोहराले फेरि अध्यक्षमा दोहोरिने संकेत दिइरहेका छन् । अप्ठ्यारो अवस्थामा पार्टीको नेतृत्व गरेका बोहरालाई अहिले पनि बलियो उम्मेदवारको रुपमा हेरिन थालिएको छ । उनी एमाले अध्यक्ष ओली निकटका नेताका रुपमा पनि चिनिन्छन् । 

यसअघिको अधिवेशनमा ओलीका तर्फबाट जिल्ला अध्यक्षको उम्मेदवार बोहरा र रावलका तर्फबाट प्रकाश शाह चुनावी मैदानमा थिए । ‘एकातिर भीम रावल र उनका कार्यकर्ताको असहयोग अर्कोतिर एमाले फुटेर समाजवादीमा गइसकेको विषम परिस्थितिमा चन्द्र बोहराले पार्टी बचाएका हुन् । उतारचढावबीच उनको पहिलो कार्यकाल सकियो, अब एमाले एक ढिक्का छ । सहज अवस्थामा उनलाई फेरि एकपटक जिम्मेवारी दिनुपर्छ,’ एमालेका उच्चस्तरका एक नेताले भने, ‘जिल्लादेखि केन्द्रसम्मको नेतृत्व पनि उनीदेखि सन्तुष्ट देखिन्छ । चुनाव नै भए पनि बोहराले जित्ने आकलन छ ।’ जिल्ला अध्यक्षका लागि लबिङ गरिरहेका अर्का बलियो उम्मेदवारका रुपमा पूर्व प्रदेश कमिटी सदस्य एवं अछामका प्रभावशाली नेता शिवप्रसाद उपाध्याय पनि छन् । २०७९ सालको प्रदेशसभा निर्वाचनमा क्षेत्र नं २ (ख) बाट प्रत्यक्षतर्फका उम्मेदवार उनी जसरी पनि जिल्ला नेतृत्व लिने तयारीमा रहेका छन् ।