धनगढी — गृहमन्त्री रमेश लेखकले विपद् जोखिम न्यूनीकरण तथा व्यवस्थापनका लागि सबै मिलेर काम गर्नुपर्ने बताएका छन् ।
कैलालीको धनगढी उपमहानगरपालिका १३ स्थित प्रादेशिक आपतकालीन गोदामघर हस्तान्तरण कार्यक्रममा गृहमन्त्री लेखकले काठमाडौंमा रहेको आपतकालीन गोदामघरलाई केन्द्रीय गोदामघरको रुपमा विकास गर्ने सरकारी योजना रहेको बताए ।
उनले वैदेशिक सहयोगबाट प्राप्त सामग्री तथा सरकारले खरिद गरेरै प्रदेशमा रहेका आपतकालीन गोदामघरमा आवश्यक विपद सामग्री उपलबध गराइने बताए ।
सरकारले प्रदेशलाई हस्तान्तरण गरिएका आपतकालीन गोदामघरको रेखदेख गर्ने जिम्मेवारी अब प्रदेश सरकारको भएको उनको भनाइ छ । गृहमन्त्री लेखकले विपदको समयमा प्रदेश सरकारसँगको समन्वयमा काम गर्न मातहतका निकायलाई निर्देशन दिए ।
त्यसक्रममा गृहमन्त्री लेखकले प्रादेशिक आपतकालीन गोदामघर मुख्यमन्त्री कमल बहादुर शाहलाई हस्तान्तरण गरे ।
