खोटाङ — कोशी प्रदेश स्तरीय बुद्धिचालको उपाधि झापाका प्रकाशचन्द्र नेपालले जितेका छन् । दिक्तेलमा मंगलबार सम्पन्न खेलमा धनकुटाका सुमन श्रेष्ठलाई पराजित गर्दै नेपालले उपाधि चुमेका हुन् ।

नेपालले नगद ३० हजारसहित ट्रफी, मेडल र प्रमाणपत्र पाएका छन् । दोस्रो हुने धनकुटाका सुमन श्रेष्ठले नगद १५ हजार पाए । सुनसरीका ललितबहादुर राई तेस्रो भए । उनले नगद १० हजार पाए । 

त्यसै गरी महिलातर्फको खेलमा खोटाङ ऐसेलुखर्ककी कुसुम घिसिङ प्रथम भइन् । उनले ताप्लेजुङकी लीला सेनेहाङलाई पराजित गर्दै जित सुनिश्चित गरेकी हुन् । प्रथम हुने घिसिङले नगद ७ हजारसहित मेडल, ट्रफी र प्रमाणपत्र तथा दोस्रो हुने सेनेहाङले नगद ५ हजार पाइन् । खोटाङ हलेसीकी तपस्या कार्कीले तेस्रो हुँदै नगद ४ हजार पाइन् ।

त्यसैगरी हिल च्याम्पियनमा ताप्लेजुङका ङिमा शेर्पा, खोटाङ प्रथम हलेसीका मनकुमार राई र दिक्तेल रूपाकोट मझुवागढी नगर प्रथम आयुस राई घोषित भएका छन् । उनीहरूले क्रमशः ४ हजार र ३ हजार नगद पाए । 

अन्डर–१६ मा पञ्च मावि दिक्तेलका अभिशेख आचार्य र अण्डर १२ मा पनि पञ्च माविकै क्रिसल प्रधान विजयी भए । उनीहरूले क्रमशः ४ हजार र ३ हजार पाए ।

विद्यार्थीतर्फ पञ्च मावि दिक्तेलका राकेश राई प्रथम, दिक्तेल इङ्लिस सेकेन्डरी बोर्डिङ स्कुलका कमल राजभण्डारी दोस्रो र सरस्वती माविका सुशान्त राई तेस्रो भए । उनीहरूले क्रमशः ५ हजार, ४ हजार र ३ हजार नगद पाए ।

उक्त प्रतियोगिता कोशी प्रदेश खेलकुद विकास बोर्डको आर्थिक सहयोगमा नेपाल खेलकुद प्रतिष्ठानको आयोजनामा सम्पन्न भएको हो । प्रतियोगितामा कोशी प्रदेश बुद्धिचाल संघको सह–आयोजना, जिल्ला खेलकुद विकास समिति खोटाङको संयोजन र जिल्ला बुद्धिचाल संघ खोटाङको व्यवस्थापन रहेको थियो ।