काठमाडौँ — ‘फुटबल सबैको लागि हो’ भन्ने नारा सहित टुवेल्भ फुटबल ट्रेनिङ सेन्टर र नियो चाइल्ड कियर सेन्टर बीच न्युरोडाइभर्स बालबालिकाका लागि विशेष फुटबल प्रशिक्षण कार्यक्रम सञ्चालन गर्ने उद्देश्य सहित सम्झौता भएको छ । 

सम्झौता अनुसार नियो चाइल्डको सहकार्यमा टुवेल्भ फुटबल ट्रेनिङ सेन्टरले अटिजम स्पेक्ट्रम डिसअर्डर (एएसडी) तथा डाउन सिन्ड्रोम भएका बालबालिकालाई लक्षित गर्दै ‘सँगै खेलौं’ नामक विशेष कार्यक्रम सञ्चालन गर्नेछ । टुवेल्भ फुटबलले आफ्नो नियमित ग्रासरुट प्रशिक्षण कार्यक्रमसँगै यो विशेष कार्यक्रम सुचारु गर्न लागेको जनाएको छ । सामान्य बालबालिकाहरू र यी बालबालिकाहरूको प्रशिक्षण भने फरक समयमा हुने उसले जनाएको छ ।

राष्ट्रिय फुटबल टोलीका पूर्व कप्तान विराज महर्जन तथा गोलरक्षक विकेश कुथुद्वारा बालबालिकाहरूको फुटबल कौशल विकास गर्ने लक्ष्य सहित टुवेल्भ फुटबल सञ्चालनमा रहेको छ भने नियो चाइल्ड राष्ट्रिय फुटबल टोलीका पूर्व फिजियोथेरापिस्टद्वय शमेद कतिला श्रेष्ठ र सुरज भुसालद्वारा सञ्चालित अटिजम स्पेक्ट्रम डिसअर्डर र डाउन सिन्ड्रोम भएका बालबालिकाहरू सहित न्यूरोडाइभर्स बालबालिकाहरूका लागि शैक्षिक तथा विशेष सेवाहरू प्रदान गर्दै आएको संस्था हो ।