खोटाङ — खेलकुदको बजेट अनियमिततामा संलग्नलाई कारबाहीको माग गर्दै जिल्लास्थित विभिन्न खेलकुदसंग सम्बद्ध संस्थाहरूले प्रमुख जिल्ला अधिकारीलाई ज्ञापनपत्र बुझाएका छन् ।

१०औं राष्ट्रिय खेलकुद प्रतियोगिताको तयारीका लागि कोशी प्रदेश खेलकुद विकास बोर्डले पठाएको बजेट अनियमिततामा संलग्न रहेको आरोपमा खेलकुद विकास समिति खोटाङका अध्यक्ष रमेश राई ‘महेश’ र कार्यालय प्रमुख लिलाभक्त केसीमाथि कानुनी कारबाहीको माग गर्दै बुधबार प्रमुख जिल्ला अधिकारी रेखा कँडेललाई ज्ञापनपत्र बुझाएका हुन् ।

राई र केसीको मिलेमतोमा कोशी प्रदेश खेलकुद विकास बोर्डले पठाएको ८ लाखमध्ये ६ लाख ७६ हजार दिक्तेलस्थित कृषि विकास बैंकमा रहेको खाताबाट निकालेको र उक्त रकम तत्काल फिर्ता गर्नुका साथै रकम अपचलनमा संलग्नलाई कानुनी कारबाहीको माग गर्दै ज्ञापनपत्र बुझाएका हुन् ।

२०८१ माघ १९ गते ३८ हजार, चैत ११ गते एक लाख २५ हजार, चैत ३१ गते ४ लाख २० हजार, २०८२ बैशाख २३ गते १० हजार, २०८२ साउन ११ गते ४३ हजार र २०८२ माघ ११ गते ४० हजार गरी ६ लाख ७६ हजार निवर्तमान अध्यक्ष राईको नाममा निकासा भएको उल्लेख गर्दै यसमा संलग्नलाई कानुनी कारबाहीको माग गर्दै ज्ञापनत्र बुझाएका हुन् ।

कोशी प्रदेश खेलकुद विकास बोर्डबाट २०८२ जेठ १४, साउन २० र कात्तिक १७ गते रकम जम्मा गर्न गरेको पत्राचारलाई बेवास्ता गर्दै कालोसूचीमा राख्न बाध्य पारी खेल क्षेत्रलाई शून्य स्थितिमा पुर्‍याएको भन्दै प्रमुख जिल्ला अधिकारीको ध्यानाकर्षण गराएको नेपाल खेलकुद प्रतिष्ठान खोटाङका अध्यक्ष सञ्जयकुमार राईले बताए । 

ज्ञापनपत्रमा जिल्ला खेलकुद विकास समितिको अध्यक्षजस्तो गरिमामय पदमा बसेर खेल क्षेत्रको विकास तथा खेलाडीहरूको हक हितका लागि काम गर्नु पर्नेमा उल्टै खेलकुद प्रतियोगिताका लागि प्राप्त बजेट अपचलन गरी जिल्लाको खेल गतिविधि शून्य बनाउने र २ वर्षसम्म राष्ट्रपति रनिङ शिल्ड प्रतियोगिता नगरी खेलाडीहरूको खेल खेल्ने अवसरबाट बन्चित गरी खेलाडीहरूको मनोबल गिराउने तथा सिंगो खेल क्षेत्र पछाडि धकेलेको भन्दै आपत्ति जनाएका छन् ।

प्रदेश खेलकुद विकास बोर्डले पठाएको ८ लाखमध्ये ६ लाख ५६ हजार अध्यक्ष राईले पेश्की बापत लिएको र २० हजार मसलन्दमा खर्च भएको कार्यालय प्रमुख लिलाभक्त केसीले बताए । अन्य १ लाख ४४ हजार भने २०८१ असारमा बुइपामा भएको प्रदेशस्तरीय महिला फुटबल प्रतियोगितामा खर्च भएको उनले बताए ।

अध्यक्ष राईले गलत मनसायले निकासा नगरेको उल्लेख गर्दै पेश्की बापत लिएको रकम ३ दिनभित्रै जम्मा गर्ने गत जेठ ३० गते बताएका थिए । तर, अहिलेसम्म फिर्ता नगरेकाले ज्ञापनपत्र बुझाउनु परेको नेपाल सितोरियो कराते संघ खोटाका अध्यक्ष मिलन कसजूले बताए । प्रमुख जिल्ला अधिकारी कँडेलले यसबारेमा छलफल गर्ने बताएकी छन् । ‘यसबारेमा के भाएको हो, एक चोटी छलफल गरौंन,’ कँडेलले भनिन् ।

ज्ञापनपत्रमा नेपाल कराते महासंघ खोटाङका अध्यक्ष सुमन राई, जिल्ला खेलकुद कबड्डी संघ खोटाङका अध्यक्ष चन्द्रकुमार श्रेष्ठ, जिल्ला ब्याडमिन्टन संघ खोटाङका अध्यक्ष पर्शुराम थापा आशिष, नेपाल सितोरियो कराते संघ खोटाङका अध्यक्ष मिलन कसजू, जिल्ला एथ्लेटिक्स संघ खोटाङका उपाध्यक्ष धनिराम राई, नेपाल तेक्वान्दो संघ खोटाङका सचिव मोहन राई, नेपाल खेलकुद प्रतिष्ठानका अध्यक्ष सञ्जयकुमार राई, कराते अन्तराष्ट्रिय प्रशिक्षक मोतिचन्द्र राई, भलिबल अन्तराष्ट्रिय प्रशिक्षक जितेन्द्र राई, भलिबल प्रशिक्षक तथा निर्णायक मिलन राई, जिल्ला बुद्धिचाल संघ खोटाङका उपाध्यक्ष कृष्ण गुरुङ र फुटबल खेलाडी तथा निर्णायक शैलेन्द्र बजिमयले हस्ताक्षर गरेका छन् ।