काठमाडौँ — झन्डै दुई दशक विश्व फुटबलमा लियोनल मेसी र क्रिस्टियानो रोनाल्डो वर्चस्व रहेको छ । विश्व फुटबलका दुई लिजेन्डबीच व्यक्तिगत रूपमा प्रतिद्वन्द्विता नदेखिए पनि फ्यानहरू भने बाँडिने गरेका छन् । मेसी र रोनाल्डोका फ्यान उनीहरूको सफलता, असफलता र तथ्यांक प्रस्तुत गरेर 'राइभल्‍री' देखाउने प्रयास गर्छन् । 

ला लिगामा बार्सिलोना र रियल म्याड्रिडबाट खेलेका मेसी र रोनाल्डो धेरै पटक आमनेसामने भएका छन् । अर्जेन्टिना र पोर्चुगलबाट भने उनीहरू विरलै प्रतिस्पर्धामा उत्रिएका छन् । विश्वकपमा त उनीहरू आमनेसामने भएकै छैनन् । पछिल्लो पटक २०१४ मा अन्तर्राष्ट्रिय मैत्रीपूर्ण फुटबलमा पोर्चुगल र अर्जेन्टिना भिडेका थिए । उक्त खेल पोर्चुगलले १-० ले जितेको थियो । ४५ मिनेट मात्र खेलेका दुवैले भने गोल गर्न सकेनन् । त्यसअघि २०११ को मैत्रीपूर्ण खेल अर्जेन्टिनाले २-१ ले जित्दा मेसी र रोनाल्डो दुवैले एक-एक गोल गरेका थिए । 

अन्तिम पटक भने उनीहरू २०२३ जनवरी १९ मा रियाधमा एउटै मैदानमा मैत्रीपूर्ण खेलमा उत्रिएका थिए । रियाधमा मेसी पीएसजी र रोनाल्डोले रियाध अल स्टार-११ को प्रतिनिधित्व गरेका थिए । हाइस्कोरिङ उक्त खेल पीएसजीले ५-४ ले जितेको थियो । मेसीले खेल सुरू भएको तेस्रो मिनेटमै गोल गरे भने रोनाल्डोले दुई गोल गरेका थिए । उनीहरू करिब ६० मिनेट मात्र मैदानमा रहेका थिए । 

अन्तिम आधिकारिक प्रतिस्पर्धा भने २०२० डिसेम्बर ८ मा भएको थियो । यूईएफए च्याम्पियन्स लिगको समूह चरणमा नु क्याम्पमा मेसी र रोनाल्डो एकअर्काविरुद्ध उत्रिएका थिए । रोनाल्डो युभेन्टस र मेसी बार्सिलोनाबाट खेलेका थिए । उक्त खेल बार्साले ३-० ले जितेको थियो ।  

मेसी र रोनाल्डो दुवैले २०२३ मा युरोपेली फुटबलबाट बिदा लिएका थिए । मेसी पीएसजी र रोनाल्डो म्यानचेस्टर युनाइटेडबाट अमेरिकाको इन्टर मायामी र रोनाल्डो साउदी अरेबियाको अल नासरमा आबद्ध भएका थिए ।  

दुवै खेलाडीले जर्मनीमा २००६ मा भएको प्रतियोगिताबाट विश्वकपमा डेब्यु गरेका थिए । अहिलेसम्म विश्वकपमा प्रतिस्पर्धा गर्न नपाएका उनीहरू यसपल्ट आमनेसामने हुने सम्भावनाचाहिँ कति छ ? यसको उत्तर त्यति सहज भने छैन । अर्जेन्टिना र पोर्चुगलले आफ्नो समूह तथा प्रतियोगिताको समूह चरण पार गर्न कुन बाटो तय गर्नुपर्ने हो भन्ने कुरा पहिल्यै थाहा पाइसकेका छन् । दुवै टोलीबीच भेट हुने निश्चित छैन, तर यसपटकको प्रतियोगिताको ढाँचाले वर्षौँसम्म असम्भवजस्तै देखिएको सम्भावनाको ढोका भने खुला राखेको छ ।

जोर्डन, अस्ट्रिया र अल्जेरियासँगै अर्जेन्टिना समूह 'जे' मा रहेको छ । लियोनल स्कानोलीको अर्जेन्टिनाले बुधबार बिहान आफ्नो पहिलो खेलका रूपमा अल्जेरियासँग प्रतिस्पर्धा गर्नेछ । त्यस्तै दोस्रो खेल जुन २२ मा अस्ट्रिया र समूह चरणको अन्तिम खेल जुन २८ मा जोर्डनविरुद्ध खेल्नेछ । 

समूह 'के' मा रहेको पोर्चुगलले भने पहिलो खेल जुन १७ मा डीआर कंगोसँग खेल्नेछ । त्यस्तै जुन २३ मा उज्बेकिस्तान र समूह चरणको अन्तिम खेलका रूपमा जुन २७ मा कोलम्बियासँग पोर्चुगलले प्रतिस्पर्धा गर्दैछ । सरसर्ती हेर्दा दुवै टोली नकआउट चरणमा पुग्ने बलिया दाबेदार मानिन्छन् । तर विश्वकप प्रायः अपेक्षित स्क्रिप्टअनुसार अघि बढ्दैन । प्रत्येक चरणमा अनपेक्षित रिजल्ट पनि आउन सक्छ । स्पेनलाई काबो भर्डेले बराबरीमा रोकिदियो । ४ पल्टको विश्वविजेता इटली छनोट नै हुन नसकेको उदाहरण पनि ताजै छ । 

यदि अर्जेन्टिना र पोर्चुगल आफ्नो समूहमा शीर्ष स्थानमा रहँदै राउन्ड अफ-३२ र राउन्ड अफ-१६ मा प्रवेश गरे भने क्वार्टफाइनलमा दुई टोलीको भेट हुनसक्छ । यही नै मेसी र रोनाल्डो विश्वकपमा पहिलो पटक एकअर्काविरुद्ध खेल्ने सम्भावित सबैभन्दा 'डिरेक्ट' बाटो हो । तर यो यात्रा पनि निश्चित त होइन । दुवै राष्ट्रले आफूलाई उपाधि दाबेदार सावित गर्नुपर्नेछ र अन्तिम चरणसम्म पुग्ने लक्ष्य राखेका अन्य बलिया टोलीहरूलाई पनि पार गर्नुपर्नेछ ।

यो सम्भावनाभन्दा पनि मेसी र रोनाल्डोका फ्यानहरूको चाहना बढी हो । यो कुनै भविष्यवाणीभन्दा बढी प्रतियोगिताको ढाँचाभित्र रहेको वास्तविक सम्भावना मात्र हो । यस्तो सम्भावना, जुन नतिजा, प्रदर्शन र दुवै टोलीले नकआउट चरणका सुरुआती खेलहरू पार गरेर आफ्नो अभियानलाई जीवित राख्न सकेमा मात्र साकार हुन सक्छ ।

तर एउटा कुरा के पक्का हो भने फुटबलको एउटा युगलाई नै परिभाषित गरेका दुई खेलाडीको कथा अझै पूर्ण भएको छैन । विश्व फुटबलको सबैभन्दा ठूलो प्रतियोगितामा उनीहरूबीचको प्रत्यक्ष भिडन्तको एउटा अध्याय अझै लेखिन बाँकी छ ।

विश्वकपमा मेसी र रोनाल्डो 

अहिलेसम्म विश्वकपमा ५ संस्करणमा मेसीले २६ खेल खलेका छन् । जसमा १३ गोल र ८ असिस्ट उनको नाममा रेकर्ड छ । २०२२ को विश्वकपमा मेसी नेतृत्वको अर्जेन्टिना नै च्याम्पियन बनेको थियो । त्यस्तै विश्वकपका २२ खेलमा रोनाल्डोले ८ गोल र २ असिस्ट गरेका छन् ।

मेसीलाई यसपल्ट जर्मन खेलाडी मिरोस्लाभ क्लोजको रेकर्ड तोड्ने अवसर पनि छ । क्लोजले विश्वकपमा १६ गोल गरेका छन् । त्यसो मेसीको पछिपछि फ्रान्सेली स्टार किलियन एम्बापे रहेका छन् । उनको नाममा १२ गोलको रेकर्ड रहेको छ । 

पोर्चुगलले अहिलेसम्म निकालेको उत्कृष्ट नतिजा भनेको रोनाल्डोले डेब्यु गरेको वर्ष २००६ चौथो स्थान हासिल गर्नु नै हो । यद्यपि रोनाल्डोले पोर्चुगललाई २०१६ मा युरो कपको उपाधि दिलाउन सफल भएका थिए । यद्यपि पोर्चुगलले सन् १९६६ मा विश्वकपमा तेस्रो स्थान हासिल गर्न सफल भएको थियो ।

-मार्कालगायतका सञ्चारमाध्यमको सहयोगमा