काठमाडौँ — नेपालले एसीसी वुमन्स प्रिमियर कप क्रिकेटमा हङकङसँग नमिठो हार बेहोरेको छ । मलेसियामा भइरहेको प्रतियोगितामा हङकङले शनिबार नेपाललाई ६९ रनले पराजित गरेको हो । 

१ सय १० रनको लक्ष्य पछ्याएको नेपाल क्वालालम्पुरस्थित कोलेज टुएन्कु जाफर ओभलमा केवल १३.३ ओभर खेली ४० रनमा अलआउट भयो । महिला ट्वान्टी–२० अन्तर्राष्ट्रियमा नेपालको यो सबैभन्दा न्यून स्कोर हो । 

सन् २०१९ मा पोखरामा भएको दक्षिण एसियाली खेलकुदमा बंगलादेशसँग र २०२३ मा मलेसियासँग बाङ्गीमा गरी दुवै पटक नेपाल ५० रनमा अलआउट भएको थियो, जुन नेपालको महिला ट्वान्टी–२० अन्तर्राष्ट्रियमा यसअघिको न्यून स्कोर थियो ।

नेपालले पहिलो दिनको खेलमा बुधबार चीनलाई ८ विकेटले र बिहीबार भुटानलाई ५१ रनले पराजित गरेको थियो । तर, हङकङसँगको हारपछि नेपाल समूह ‘डी’ को उपविजेता बनेको छ । नेपाललाई हङकङले समूहमा उछिनेको छ । नेपाल र हङकङ यसअघि नै क्वार्टरफाइनल पुगिसकेका थिए । 

नेपालले निकै खराब सुरुआत गरेको थियो । पहिलो ओभरमै ओपनर विन्दु रावल आफूले सामना गरेको पहिलो बलमै आउट भइन् । अर्का ओपनर सम्झना खड्काले पनि ३ रनमात्र बनाउन सकिन् । उपकप्तान पूजा महतोले पनि खाता खोल्न सकिनन् । शून्यमा आउट हुने तेस्रो खेलाडी थिइन्, रुबि पोदार । 

विन्दु, पूजा र रुबिपछि हङकङकी इक्रा सहरले कप्तान इन्दु बर्मालाई पनि आउट गरिन् । इन्दुले ६ रनमात्र बनाउन सकिन् । सहरले ४ ओभरमा ४ रनमात्र खर्चेर ४ विकेट लिइन् । सोनी पाख्रिन २३ बल खेली १२ र रुबिना क्षेत्री १२ बल खेली १० रनमा आउट भए । दुवैले समान २ चौका प्रहार गरेका थिए । 

सीता रानामगर र रिया शर्माले पनि १–१ रनमात्र बनाउन सके । मनीषा उपाध्याय नेपाली इनिङ्समा शून्यमा आउट हुने चौथो खेलाडी बनिन् । कविता कुँवर ८ बल खेली ४ रन बनाई अविजित रहिन् । सहरबाहेक हङकङबाट चान केरी र मारयम बिबीले २–२ विकेट लिए ।