मकवानपुर — हेटौंडा–६ स्थित गौरीटार रंगशालामा जारी बागमती कप टी–२० क्रिकेट प्रतियोगितामा बुधबार ललितपुर र भक्तपुर विजयी भएका छन्। 

पहिलो खेलमा ललितपुरले नुवाकोटलाई ३० रनले पराजित गर्दा दोस्रो खेलमा भक्तपुरले काठमाडौंलाई १ विकेटले हराउँदै लगातार दोस्रो जित दर्ता गरेको हो ।

पहिलो खेलमा टस जितेर पहिले ब्याटिङ गरेको ललितपुरले २० ओभरमा ६ विकेट गुमाएर १७८ रन बनाएको थियो । ललितपुरका सचिन लेखक ५७ रनमा अविजित रहे भने आदिल खानले २८, रानिम तिवारीले २२ तथा विवेक राना मगरले २० रन जोडे । नुवाकोटका गणेश गौतम र ईशान पुरीले समान २–२ विकेट लिए ।

जितका लागि १७९ रनको लक्ष्य पछ्याएको नुवाकोटले निर्धारित २० ओभरमा ७ विकेट गुमाएर १४८ रन मात्र बनाउन सक्यो । नुवाकोटका दिनेश सुवेदीले ४७, अनुभव खनालले अविजित ४० तथा राजेश रिमालले २१ रन बनाए । ललितपुरका विवेक राना मगर र सारश खत्रीले समान २–२ विकेट लिए । यससँगै ललितपुरले प्रतियोगितामा दोस्रो जित दर्ता गर्दा नुवाकोटले लगातार तेस्रो हार बेहोरेको छ ।