काठमाडौँ — नेपालका ट्वान्टी–२० कप्तान दीपेन्द्रसिंह ऐरीसहित सन्दीप लामिछाने र कुशल भुर्तेलले श्रीलंकाको लंका प्रिमियर लिग (एलपीएल) खेल्ने भएका छन् । तर राष्ट्रिय टोलीबाट व्यस्त हुनुपर्ने भएकाले उनीहरुले एलपीएलका सुरुआती खेल गुमाउने भएका छन् ।

एलपीएलको आइतबार भएको ड्राफ्टबाट जाफ्ना किंग्सले दीपेन्द्र र सन्दीपलाई तथा कोलम्बो क्याप्सले कुशललाई लिएको हो । एलपीएल खेले बापत सन्दीपले २० हजार डलर तथा दीपेन्द्र र कुशलले १५ हजार डलर पारिश्रमिक पाउने छन् । जाफ्नाका कप्तान भानुका राजापाक्छे र कोलम्बो क्याप्सका कप्तान कुशल मेन्डिस हुन् । 

नेपालका पूर्वप्रशिक्षक पुबुदु दासानायकेले गेल गालन्ट्स हेरिरहेका छन् । सन् २०२० मा सुरु भएको एलपीएलको यो छैटौं संस्करण हो । जाफ्ना किंग्सले सन् २०२०, २०२१, २०२२, २०२४ मा गरी चार पटक एलपीएल जितिसकेको छ । २०२० मा भने टोलीले जाफ्ना स्टेलियन्सको नाममा खेलेको थियो । २०२५ मा प्रतियोगिता आयोजना भएको थिएन् ।