काठमाडौँ — एसियन गेम्स क्वालिफायर्समा नेपालले पहिलो खेलमा चीनविरुद्ध २२१ रनको फराकिलो जित निकालेको छ । टस हार्दै नेपालले दिएको ३१४ रनको विशाल लक्ष्य पछ्याउने क्रममा चीन ९२ रनमै अलआउट हुनपुग्यो । 

नेपालले चीनविरुद्ध पहिला ब्याटिङका लागि बोलाइएपछि निर्धारित २० ओभरमा २ विकेट गुमाई ३ सय १३ रन बनाएको थियो । नेपाल ट्वान्टी–२० अन्तर्राष्ट्रियमा दुई पटक ३ सय रन माथि स्कोर बनाउने पहिलो टोली बनेको छ । चीनको हानजाउमा २०२३ मा भएको एसियाली खेलकुदमा नेपालले मंगोलियाविरुद्ध यसअघि ३१४–३ को स्कोर बनाएको थियो । नेपालको यो दुबै स्कोर ट्वान्टी–२० अन्तर्राष्ट्रियको उच्च स्कोरमा दोस्रो र तेस्रो नम्बरमा पर्छ । जिम्बावेले २०२४ मा नैरोबीमा गाम्बियाविरुद्ध ३४४–४ को स्कोर बनाएको थियो, जुन ट्वान्टी–२० अन्तर्राष्ट्रियको उच्च स्कोर हो । जर्मनी, इंग्ल्यान्डले पनि १–१ पटक ट्वान्टी–२० अन्तर्राष्ट्रियमा ३ सय माथिको स्कोर बनाएका छन् ।

नेपालका लागि ओपनर कुशल भुर्तेलले सर्वाधिक १२९ रनको पारी खेले । मात्र ४३ बल खेलेका उनले १६ छक्का र ५ चौका प्रहार गरे । भुर्तेलको ट्वान्टी–ट्वान्टी करिअरमा यो सर्वाधिक स्कोरसमेत हो । आजको खेलमा भुर्तेलले ६ छक्कासमेत प्रहार गरेका छन् । उनी नेपालका लागि एकै ओभरमा ६ छक्का हान्ने दोस्रो खेलाडी बनेका छन् । यसअघि दीपेन्द्रसिंह ऐरीले मंगोलिया र कतारविरुद्ध ६ छक्का प्रहार गरेका थिए । 

यस्तै कुशल मल्ल र कप्तान रोहितकुमार पौडेलले पनि अर्धशतक प्रहार गरे । मल्लले अविजित ४७ बलमा ८५ रन बनाए । उनले त्यसक्रममा ८ चौका र ५ छक्का हिर्काए । 

कप्तान पौडेलले पनि आक्रामक पारी खेल्दै १७ अर्धशतक बनाए । अविजित रहेका पौडेलले मात्र २१ बलमा ७ छक्का र ५ चौकाको सहयोगमा ६९ रन बनाए । ओपनर आशिफ शेख भने १० बलमा १ छक्का र १ चौकाको सहयोगमा ११ रन बनाउँदै आउट भएका थिए । 

कुशलद्वारा एकै ओभरमा ६ छक्का प्रहार

कुशल भुर्तेल एकै ओभरमा ६ छक्का प्रहार गर्ने नेपालका दोस्रो खेलाडी बनेका छन् । उनले चीनविरुद्ध खेलको नवौं ओभरमा चेन झोउ युईलाई एकै ओभरमा ६ छक्का प्रहार गरेका थिए । कुशलले नवौं ओभरको पहिलो ५ बलमा लगातार छक्का प्रहार गरेका थिए । त्यसपछि झोउले छैटौं बल वाइड फाल्न पुगेका थिए । छैटौं लिगल बलमा कुशलले फेरि छक्का प्रहार गरेका थिए । नेपालका दीपेन्द्रसिंह ऐरीले २०२४ मा कतारविरुद्ध ओमानमा एकै ओभरमा लगातार ६ छक्का प्रहार गरेका थिए । दीपेन्द्रले चीनको हानजाउमा २०२३ मा भएको एसियाली खेलकुदमा मंगोलियाविरुद्ध पनि दुई फरक ओभरमा गरेर लगातार ६ छक्का प्रहार गरेका थिए ।

कुशल दुई शतक बनाउने नेपालको पहिलो