काठमाडौँ — नेपालले जित्न त जित्यो, तर यो जित मन छुने खालको रहेन कि ? नेपालले महिला साफ च्याम्पियनसिप फुटबलमा सोमबार विजयी सुरुआत लिएको छ । त्यो भुटानमाथि एक गोलको जित निकाल्दै हो । यो जित कस्तो रह्यो भने नेपालका लागि यसले प्रतियोगिताको सेमिफाइनल पुग्ने बाटो सजिलो बनाइदिएको छ । जितपछि नेपालको खातामा ३ अंक छ । अब आइतबार समूह ‘ए’ को आफ्नो दोस्रो खेलमा नेपालले श्रीलंकाको सामना गर्दा आरामले खेल्न सक्नेछ । तर नेपालको सुरुआती प्रदर्शनका आधारमा खेल सन्तोषजनक रहेन । 

‘यो नतिजालाई लिएर चिन्ता लिनुपर्दैन,’ नेपाली प्रशिक्षक नवीन न्यौपानको दाबी छ । खेलपछि मिडियासामु प्रस्तुत हुने क्रममा उनले भने, ‘टिम हिजै मात्र गोवामा आइपुगेको हो, त्यसैले यहाँको गर्मीसँग खेलाडी अभ्यस्त हुन सकेका छैनन् । त्यसको प्रभाव यो खेलमा पनि रह्यो । भुटान गोवा आएको ३–४ दिन भइसकेको छ । अब हामीले पाँच दिनको आराम पाउँछौं र त्यतिबेलासम्म स्थिति अनुकूल हुनेछ ।’ 

नेपालका लागि यो एक प्रकारले राहतपूर्ण नतिजा पनि रह्यो । यस्तो किनभन्दा दुई वर्षअगाडि भुटानले नेपाललाई यसअघिको संस्करणमा गोलरहित बराबरीमा रोकेको थियो । यसपल्ट पनि हार नै सही भुटानी टिम अहिलेको नतिजामा खुसी रह्यो । भुटानी प्रशिक्षक ताइन किम भने, ‘नेपालसँग एक गोलको अन्तरले मात्र हार्नु भनेको हाम्रा रक्षापंक्तिको दृष्टिकोणले जितसरह नै हो । हाम्रै डिफेक्सनमा गोल भएको थियो, यो एउटा भुल बिर्सने हो भने हाम्रो डिफेन्सले नेपालको आक्रमण रोकेकै हो ।’ 

यी दक्षिण कोरियाली प्रशिक्षकको पनि एउटा गुनासो रह्यो । उनका अनुसार यति ठूलो महत्त्वको प्रतियोगिता अगाडि भुटानी टिमले खेल अभ्यासको अवसर नै पाएन । यो नतिजासँगै कम्तीमा भुटानमाथि नेपालको प्रभुत्व कायम रह्यो । महिला फुटबलमा यी दुई टिमबीच अहिलेसम्म ६ खेल भएकोमा ५ खेलमा नेपाल विजयी छ । यी सबै ६ खेलमा नेपालले अहिलेसम्म भुटानलाई एकै गोलको अवसर दिएको छैन । कप्तान तथा गोलरक्षक एन्जिला सुब्बाले यही परम्परालाई अगाडि बढाउँदै यसपल्ट पनि ‘क्लिन सिट’ कायम राखेकी छन् ।  

गोल कि आत्मघाती ?

पण्डित जवाहरलाल नेहरु स्टेडियममा भएको खेलको निर्णायक मोड २३ औं मिनेटमा आएको थियो, जतिबेला गीता रानाको प्रहारले  ‘डिफेक्ट’ हुँदै पोस्टको दिशा लिएको थियो । त्यसको स्वरुप धेरै हदसम्म आत्मघाती गोल जस्तै थियो, तर म्याच कमिस्नरले त्यसको श्रेय गीतालाई नै दिन कन्ज्युस्याइँ गरेनन् । नेपालका लागि गीताले गरेको गोलसंख्या अब ५ पुगेको छ । प्रशिक्षक न्यौपानेले नेपाली महिला टिमका लागि दोस्रो जित पनि आत्मसात् गरेका छन् । नेपालले उनको नेतृत्वमा खेलेको यो पाँचौं खेल हो । 

भुटानविरुद्ध उनले अनिता लम्जेललाई डेब्यू अवसर पनि दिए । अनितालाई उनले सुरुआती ११ मै सामेल गरेका थिए । तर उनी पहिलो हाफ मात्र टिकिन् र उनको स्थानमा राष्ट्रिय टिममा कमब्याक गरिरहेकी सविना चौधरीले मौका पाइन् । पोस्ट म्याच कन्फ्रेन्समा प्रशिक्षक न्यौपोनले अनिताको प्रदर्शनप्रति खुसी व्यक्त गरे । उनले भने, ‘अनिताको प्रदर्शनमा म सन्तुष्ट नै छु । यो खेलमा सावित्रा भण्डारीको अभाव त देखियो, तर यसले नयाँ खेलाडीलाई अवसर दिने काम पनि गरिरहेको छ ।’