इस्तानबुल — इंग्लिस प्रिमियर लिग क्लब एस्टन भिल्लाले बुधबार युरोपा लिग जितेपछि प्रशिक्षक उनाइ इमरीले आफूलाई यो प्रतियोगिताका राजा साबित गरेका छन् । भिल्लाले युरोपेली क्लब फुटबलको दोस्रो ठूलो प्रतियोगिता जित्न जर्मनीको फ्रेइबर्गलाई सजिलै ३–० ले हराएको हो । इटालीका जियोभानी ट्रापाटोनी र कार्लो एन्सेलोट्टी तथा पोर्चुगलका जोसे मोउरिन्होसँगै इमरी पनि सबैभन्दा बढी युरोपेली फाइनल जित्ने प्रशिक्षक भएका छन् ।

उनी एन्सेलोट्टीसँगै पाँच फरक अवसरमा युरोपेली उपाधि जित्ने प्रशिक्षक भएका छन् । भिल्लाका लागि योउरी टेलेमन्सले गोलको खाता खोलेपछि इमिलिनो बुएन्डिआले पहिलो हाफको अन्त्यतिर दोस्रो गोल थपे । मोर्गन रोर्जसले दोस्रो हाफमा तेस्रो गोल गरे । यो नतिजाले युरोपा लिग जित्न स्पेनी प्रशिक्षक इमरी विशेषज्ञ रहेको प्रमाणित भएको छ । उनले सेभियाका लागि सन् २०१४ देखि २०१६ सम्म लगातार तीनपल्ट युरोपा लिग जितेका थिए ।

सन् २०२१ मा उनले यस्तै सफलता भिल्लारियलका लागि हात पारेका थिए । यसरी उनले तेस्रो क्लबका लागि युरोपा लिगा जितेका छन् । भिल्लाको जितपछि उनले भने, ‘युरोपका प्रतियोगिताका लागि म जहिले पनि कृतज्ञ रहने छु । चाहे त्यो कन्फ्रेन्स लिग र च्याम्पियन्स लिग होस् वा युरोपा लिग होस् । भिल्लाले यो प्रतियोगिता जित्न धेरै मिहिनेत गरेको छ । यो प्रतियोगिता जित्नकै लागि हामीले गम्भीर फुटबल पनि खेलेका छौं ।’

सन् २०१९ सम्म पनि भिल्ला इंग्लिस फुटबलको दोस्रो डिभिजनमा थियो । तर बुधबारको फाइनलमा उपाधिका लागि यही टिम बलियो प्रत्याशी थियो । सन् २०२२ मा भिल्लाले प्रशिक्षकका लागि इमरीसँग अनुबन्ध गरेको थियो । उनी टिममा आउँदा भिल्ला रेलिगेसन क्षेत्रबाट एकै स्थान मात्र अगाडि थियो र फेरि दोस्रो डिभिजनमा झर्ने डर कायम थियो । तर, उनले भिल्लालाई इंग्ल्यान्डमा मात्र नभएर युरोपकै शक्ति बनाएका छन् ।