काठमाडौँ — नेपालसामु घरेलु भूमिमा क्रिकेट विश्वकप लिग २ को यात्रा सानदार ढंगसँग टुंग्याउने अवसर छ । नेपालले शुक्रबार कीर्तिपुरस्थित त्रिवि अन्तर्राष्ट्रिय क्रिकेट रंगशालामा शीर्षस्थानको अमेरिकासँग खेल्दै छ । नेपालले सन् २०२४–२६ को लिग २ को यात्रामा घरेलु मैदानमा खेल्ने यो अन्तिम खेल हो । 

यसक्रममा नेपालले घरेलु मैदानमा ११ मध्ये ६ खेल जितेको छ, त्यसमा एक खेल अमेरिकाविरुद्ध शनिबार थियो । उत्कृष्ट ब्याटिङ सुरुआत गरेको अमेरिकालाई २ सय रनमुनि रोक्दै नेपालले कुशल भुर्तेलको शतकपछि ९ विकेटको सानदार जित पाएको थियो । जिम्बावेमा सन् २०२३ को विश्वकप छनोटयता नेपालले अमेरिकामाथि पाएको यो पहिलो विजय हो ।

आठ राष्ट्र सहभागी लिग २ मा एउटा टोलीले कुल ३६ खेल खेल्नेछ । त्यसमध्ये १२ घरेलु मैदान, १२ तटस्थ भूमि र १२ विपक्षीको भूमिमा खेल्नुपर्ने प्रावधान छ । २०२०–२३ को लिग २ को पछिल्लो सर्कलमा नेपालले घरेलु मैदानमा १२ मध्ये १० खेल जितेको थियो । त्यसअनुरुप नेपालले यस साइकलमा घरेलु मैदानमा कमजोर नतिजा ल्याएको छ, तर नेपालले बलियो प्रतिद्वन्द्वीका कारण अघिल्लो साइकलको तुलनामा कम खेल जितेको देखिन्छ । 

नेपालले यस साइकलको २०२४ को पहिलो शृंखलामा नेदरल्यान्ड्ससँग एक खेलमात्र जितेको थियो भने नामिबियासँग दुई खेल र डच टोलीविरुद्ध एक खेलमा पराजय बेहोरेको थियो । अघिल्लो महिना यूएई र ओमानसम्मिलित घरेलु शृंखलामा नेपालले यूएईविरुद्ध दुवै र ओमानविरुद्ध एक खेलमा विजयी नतिजा निकालेको थियो भने ओमानसँग एक खेलमा हार भोगेको थियो । यस शृंखलामा नेपालले स्कटल्यान्डसँग एक खेल जित्यो भने अर्को खेलमा पराजय भोग्यो । 

अमेरिकासँग जित हात पारे पुबुदु दासानायकेको टोलीविरुद्ध नेपालले घरेलु मैदानमा खेलिएको लिग २ को यात्रा ‘क्लिन स्विप’ गर्नेछ । सन् २०२० मा पछिल्लो पटक काठमाडौं आउँदा अमेरिका दुवै खेलमा नेपालसँग पराजित भएको थियो । अमेरिकाले बुधबार स्कटल्यान्डलाई ६ विकेटले पराजित गरेको थियो, जुन नेपाली भूमिमा लिग २ मा अमेरिकाको पहिलो जित थियो ।

अमेरिका लिग २ को शीर्षस्थानका साथ नेपाल आएको थियो, तर स्कटल्यान्ड र नेपालसँग पहिलो दुई खेलमा पराजित भएपछि टोलीले शीर्षस्थान स्कटल्यान्डलाई सुम्पेको थियो । तर, स्कटल्यान्डमाथि नै विजयपछि अमेरिका पुनः लिग २ को शीर्षस्थानमा उक्लिएको हो । नियमित कप्तान मोनान्क पटेलले पहिलो खेलमा चोट बोकेपछि भने अमेरिकाको ब्याटिङ सन्तुलन केही बिग्रिएको छ । 

‘नेपालसँगको पछिल्लो खेलमा हामीलाई कुनै अवसर दिइएको थिएन, नेपालले धेरै राम्रो खेलेको थियो । हाम्रो लक्ष्य एकदिवसीय विश्वकप खेल्ने हो, त्यसैले हाम्रो टोलीमा सुधार हुँदै आएको छ, स्कटल्यान्डविरुद्धको खेलमा विजय हात पार्नु त्यसैको संकेत हो,’ अमेरिकाका भेट्रान सिमर सौरभ नेत्रभाल्करले बुधबार स्कटल्यान्डसँगको खेलपछि भनेका थिए, ‘नेपालसँगको खेलमा नजिताबारे केही भन्न सकिँदैन, तर पक्कै यो प्रतिस्पर्धात्मक हुने आस लिएको छु । एनपीएलले नेपाली खेलाडीलाई धेरै सहयोग गरेको छ । नेपालको स्तर पनि बढेको छ ।’ 

६ वर्षअघि नेपाल आउँदा नेत्रभाल्कर अमेरिकाको कप्तान थिए, जतिखेर नेपालसँगको खेलमा अमेरिका ३५ रनमै अलआउट भयो । यो एकदिवसीय अन्तर्राष्ट्रियकै न्युन स्कोरको नकारात्मक कीर्तिमान थियो । नतिजा आफूअनुकूल ल्याउन नसके पनि यस पटक अमेरिकाले प्रभावकारी प्रदर्शन गर्दै आएको छ, विशेष गरी आक्रामक ब्याटिङले टोलीलाई निकै बलियो पारेको छ । 

नेपालमाथि विजय हात पारे अमेरिकाले शीर्षस्थान थप बलियो बनाउने छ । अमेरिकाको २७ खेलमा ३८ र स्कटल्यान्डको ३२ खेलमा ३८ अंकसहित पहिलो दुई स्थानमा छन्, तर नेट रनरेटका कारण अमेरिका अगाडि छ । ओमान २८ खेलमा ३१, नेदरल्यान्ड्स २४ खेलमा २८, नेपाल २७ खेलमा २२, नामिबिया २८ खेलमा २२, क्यानडा २४ खेलमा २१ र यूएई २४ खेलमा १४ अंक जोडेर क्रमशः तेस्रोदेखि आठौं स्थानमा छ । शीर्ष चार टोलीले सोझै विश्वकप छनोटमा प्रवेश पाउने प्रावधान छ ।