पेरिस — फिफा महासचिव म्याथिस ग्राफस्ट्रोमले इरानसँग आइतबार भएको बैठक सौहार्दपूर्ण रहेको बताएका छन् । वार्ता टर्किएको इस्तानबुलमा भएको थियो र त्यसको उद्देश्य अबको विश्वकपमा इरानको सहभागिता निश्चित गर्नु रहेको छ । इरानले आफ्नो समूहका सबै तीनै खेल अमेरिकी भूमिमा खेल्नेछ । 

मध्यपूर्वमा चलिरहेको युद्धका बाबजुद इरान विश्वकप खेल्न अमेरिका जानुपर्नेछ । ग्राफस्ट्रोमले भने, ‘हामीबीचको वार्ता निकै राम्रो रह्यो । इरानको एफएसँगको कुराकानी ठोस रह्यो भन्दा हुन्छ । हामीले संयुक्त रूपमा काम गरिरहेका छौं र इरानलाई अमेरिकामा स्वागत गर्न आतुर छौं । हामीले इरानसँग त्यस्ता विषयमा छलफल गरेका थियौं, जुन प्रत्येक सहभागी हुने देशको एफएसँग पनि गर्छौर् । वार्ताले सकारात्मक वातावरण तयार पारेको छ र यो नै खुसी हो ।’

यसअघि इरानी फुटबल संघका अध्यक्ष मेहदी ताजले इरानी टिमका लागि अहिलेसम्म पनि अमेरिकी प्रवेश आज्ञा प्राप्त नभएको जनाएको थियो । तर आइतबारको बैठकपछि उनले स्थिति सकारात्मक रहेको स्विकारे । उनले भने, ‘हामीले इरानले बेहोर्न सक्ने समस्यालाई लिएर कुरा गरेका थियौं । हामी विश्वकपमा सहभागिता सहज चाहन्छौं ।’

बैठक टर्किएको फुटबल संघको मुख्यालयमा आयोजना गरिएको थियो । अब इरानी टिम पनि सोमबार टर्किए जानेछ र त्यहाँ बन्द प्रशिक्षणमा सहभागी हुनेछ । त्यहींबाट इरानी टिम अमेरिका जानेछ । इरानले त्यहाँ एक मैत्रीपूर्ण खेल पनि खेल्नेछ र त्यो गाम्बियाविरुद्ध रहेको छ । इरानी टिममा अहिले ३० खेलाडी रहेका छन् र अमेरिका जान अगाडि त्यसलाई २६ जनामा छोट्याउनुपर्नेछ ।