जुम्ला — समाजमा अहिले पनि छोरा र छोरी बीच विभेद कायमै छ । छोरीलाई घरबाहिर पठाउन नहुने मानसिकता विद्यमान छ । तर जुम्ला पातारासी गाउँपालिका-२ पेरेगाउँकी १८ वर्षीया कल्पना बुढाले आधारभूत तहको पढाइपछि गाउँ छाड्ने योजना बनाइन् । 

उनले दौडेर जिल्ला र देशको नाम चिनाउने प्रण गर्दै उनी तीन वर्षदेखि कीर्तिमानी धावक हरिबहादुर रोकायासँगै दौडन थालिन् । त्यसकै नतिजाले दुई वर्षदेखि निरन्तर रुपमा जुम्ला रारा म्याराथनमा महिलातर्फको स्वर्णपदक हात पार्न सफल भएकी छन् । 

कर्णाली स्पोर्टस् क्लब जुम्लाले शनिबार आयोजना गरेको जुम्ला रारा अल्ट्रा म्याराथनमा कल्पनाले स्वर्णपदक हात पारिन् । यो उनको दोस्रो पटकको सफलता थियो । सँगै दौडिएकी सुनसरी रोकाया र सन्देवा बुढालाई पराजित गर्दै कल्पनाले दुई वर्ष निरन्तर उपाधि जित्ने धाविकाको रुपमा रेकर्ड बनाइन् । उनले यो वर्षको म्याराथनमा ७ घण्टा ७ मिनेट १२ सेकेण्डमा जुम्लादेखि रारातालसम्मको ५४ किलोमिटर दुरी पार गरिन् ।उनले दुबैपटक स्वर्णपदक जितेर एक/एक लाख रुपैयाँ पुरस्कार समेत पाइन् ।

समाजमा रहेको छोरीप्रतिको परम्परागत मान्यता ताेड्ने प्रयास गर्दै दौडमै भविष्य खोजिरहेको कल्पना बताउँछिन् । ‘छोरीले घरायसी कामबाहेक केही गर्न सक्दैनन् भन्ने परम्परागत मानसिकले समाज जेलिएको छ,’ कल्पनाले भनिन्,‘त्यो मानसिकता पूर्णरुपमा भत्काउन एथ्लेटिक्समा लागेकी हुँ ।’ छोरीको सफलता देखेर उनको परिवार र गाउँले छक्क छन् । छोरीहरुलाई दौडाउनु हुन्न भन्नेहरु अहिले उनको खुलेर प्रशंसा गरिरहेका छन् । गत वर्षको जुम्ला रारा अल्ट्रा म्याराथनमा ७ घण्टा ५१ मिनेट ३२ सकेण्डमा दुरी पार गरिन् । उतिबेला ५१ किलोमिटरको दुरी पार गर्नुपर्ने थियो ।  

नियमित रुपमा दौड प्रशिक्षण गर्नुका साथै अध्ययनमा पनि उतिकै जोड दिँदै आएकी छन् । उनीसँगै राज्यलक्ष्मी रावल र सन्देवा बुढा क्रमश: द्वितीय र तृतीय भइन् । उनले दिएको प्रेरणाले अहिले जिल्लाका धेरै किशोरकिशोरी दौड अभ्यास गर्न थालेका छन् । जुम्ला रारा अल्ट्रा म्याराथनको सातौं संस्करणसम्म विजेता अधिकांश धावकधाविका नेपाली सेना र प्रहरीमा खेलाडीका रुपमा भर्ती भइसकेका छन् ।