काठमाडौँ — नेपाल ‘ए’ ले अन्तर्राष्ट्रिय अभ्यास खेलमा चौथो विजय हात पारको छ । नेपाल ‘ए’ ले क्रिकेट विश्वकप लिग–२ को तयारीको क्रममा रहेको स्कटल्यान्डलाई वर्षालाई प्रभावित खेलमा ९ रनले पराजित गर्‍यो । 

नेपाल ‘ए’ ले यसै शृंखलामा बिहीबार स्कटल्यान्डलाई ४५ रनले र शुक्रबार अमेरिकालाई ३ विकेटले पराजित गरेको थियो । नेपाल भ्रमणमा आएका टोलीविरुद्ध राजु बस्न्यातको प्रशिक्षणमा रहेको नेपाल ‘ए’ ले यसअघि ओमानलाई पनि पराजित गरेको थियो । नेपाल ‘ए’ ले सोमबार अन्तिम खेलमा अमेरिकाको सामना गर्नेछ । 

टस जितेर ब्याटिङ रोजेको स्कटल्यान्डले निर्धारित ५० ओभरमा ८ विकेट गुमाई ३ सय २ रन बनायो । जवाफमा आएको नेपाल ‘ए’ ले ४ विकेट गुमाई २ सय ४ रन बनाएको समयमा खेल वर्षाले रोकिएको थियो । सो समयमा नेपाल डकवर्थ लुइस पद्धतिका आधारमा अगाडि रहेको थियो । 

वर्षाले खेल रोकिनु ठीक अगाडि बसिर अहमद २० रन बनाई आउट भएका थिए भने सन्दीप जोरा ८३ रन बनाई क्रिजमा रहेका थिए । प्लेयर अफ द म्याच उनले ९४ बल खेल्दै ९ चौका प्रहार गरे । ओपनरद्वय मयन १२ र तृतराज दास २४ रनमा आउट भए । तृतले २० बल खेली ४ चौका प्रहार गरे । 

तेस्रो नम्बरमा आएका इशान पाण्डेले ५० रन बनाए । उनले ५३ बल खेल्दै ७ चौका प्रहार गरे । इशान र जोराले तेस्रो विकेटमा १७ ओभरभित्र १ सय ३ रनको साझेदारी गरे । स्कटल्यान्डका ब्राड्ली करी, मार्क वाट, ओलिभर डेबिडसन र माइकल लिस्कले १–१ विकेट लिए । 

यसअघि स्कटल्यान्डबाट माथिल्लोक्रमका सबै ब्याटरहरूले प्रमुख योगदान दिएका थिए । ओपनर जर्ज मन्सीले सर्वाधिक ६२ रन बनाए । उनले ५१ बल खेली ६ चौका र ३ छक्का प्रहार गरे । अर्का ओपनर फिन्ले म्याकक्रेथले ४४ बल खेली समान १ चौका र छक्कासहित ३४ रन बनाए ।