चितवन — चितवनको भरतपुर महानगरपालिका–१५ स्थित निर्माणाधीन गौतमबुद्ध अन्तर्राष्ट्रिय क्रिकेट रंगशालाको काम रोकिएको छ ।

बजेट भुक्तानी नभएको कारण देखाउँदै निर्माण कम्पनी हिमालयन कालिञ्चोक बीबीआर जेभीले भरतपुर महानगरपालिकालाई पत्र पठाउँदै वैशाख १५ देखि रंगशाला निर्माणको काम रोकेको हो । भुक्तानीका लागि पटक–पटक पत्र पठाउँदा पनि सुनुवाई नभएका कारण निर्माणको काम बाध्य भएर रोक्नु परेको निर्माण कम्पनीले जनाएको छ । 

रंगशालाका प्रोजेक्ट म्यानेजर प्रवीण क्षेत्रीले निर्माण सामग्रीमा भएको उच्च मूल्यवृद्धि, निर्माण सामग्रीको अभाव, ढुवानी समस्या बाबजुद पनि बिना भुक्तानी १३ प्रतिशत काम गरिएको र भुक्तानीकै कारण काम अगाडि बढाउन नसक्ने देखिएपछि काम रोकिएको बताए । ‘हामीले निर्माणको काम रोक्नु पूर्व १० दिनअघि नै पत्र पठाउँदा पनि भुक्तानी नभएपछि काम रोक्न बाध्य भयौं,’ प्रोजेक्ट म्यानेजर क्षेत्रीले भने । 

निर्माण कम्पनीले चैत ३० मा भरतपुर महानगरपालिकालाई विभिन्न समस्याका बाबजुद रंगशाला निर्माणको काम निरन्तर भइरहेको र भुक्तानी नभए काम गर्न नसकिने भन्दै पत्र पठाएको थियो । तर सो अवधिमा पनि भुक्तानी नभएपछि काम रोकिएको हो । 

रंगशाला निर्माणको क्रममा पुसयता ५ महिनाको १० करोड रुपैयाँ भुक्तानी हुन बाँकी रहेको निर्माण कम्पनी हिमालयन कालिञ्चोक बीबीआर जेभीका लेखा प्रमुख सम्राट सिलवालले जानकारी दिए । उनका अनुसार भुक्तानीका लागि महानगरलाई पुस ६ मा आइपीसी–५ र फागुन १० मा आइपीसी–६ को भुक्तानी माग गरिएको थियो । महानगरलाई पुस २८, माघ २२, चैत १ र चैत ३० मा गरी ४ पटक भुक्तानीका लागि पत्र दर्ता गराउँदा पनि भुक्तानी नपाएपछि काम रोकिएको लेखा प्रमुख सिलवालले जानकारी दिए । 

अहिले नै बजेट रोकिँदा आगामी वर्ष रंगशालाको स्रोत सुनिश्चितता नहुने हो भने सबै काम रोकिनेमा निर्माण काम्पनीले आशंका गरेको छ । रंगशालाको रोकिएको रकम भुक्तानीका लागि भरतपुर महानगरपालिकाले बागमती प्रदेश सरकारलाई ताकेता गर्दै आइरहेको छ । महानगरका वरिष्ठ डिभिजन इन्जिनियर सन्तोष आचार्यले बागमती प्रदेश सरकारबाट सोमबारसम्म रकम भुक्तानी हुने बताए । ‘हामी निरन्तर प्रदेश सरकारसँग समन्वयमा थियौं, सोमबार बक्यौता रकम भुक्तानी गर्ने जानकारी पाएका छौं,’ आचार्यले भने । 

भरतपुर महानगरपालिका र बागमती प्रदेश सरकारबीच यही वैशाख २२ मा प्रतिफल बाँडफाँड गर्ने सहमति पनि भएको छ । जस अनुसार रंगशालाबाट हुने आम्दानीको ४० प्रतिशत प्रदेश सरकार र ६० प्रतिशत भरतपुर महानगरपालिकाले पाउने सहमति भएको महानगरका वरिष्ठ सिनियर डिभिजन इन्जिनियर आचार्यले बताए ।

यो सहमतिपछि मात्रै बागमती प्रदेश सरकारले बक्यौता रकम भुक्तानी गर्न तयार भएको छ । प्रदेशको नीतिमै प्रतिफल बाँडफाँड भएपछि लगानी गर्न सकिने उल्लेख भएकाले यो सम्झौता नहुँदा काम रोकिएको हो । 
महानगरका वरिष्ठ सिनियर डिभिजन इन्जिनियर आचार्यका अनुसार प्रदेश सरकारले आगामी आर्थिक वर्षमा सम्झौता अनुसार बाँकी रहेको ३० करोड रुपैयाँ बजेट विनियोजन गर्ने तयारीमा छ । त्यसैले रंगशालाको कामले पूर्णता पाउने आचार्यको भनाई छ । 

रंगशालामा हालसम्म विद्युत भूमिगत तार बिछ्याएको छ भने दुई वटै भीआइपी टावरमा विद्युतको काम सकिएको छ । विद्युतका लागि आवश्यक जेनेरेटर समेत रंगशालामा आइसकेको छ । मैदानमा ड्रेन सिस्टमको सबै पाइप आइसकेको छ भने त्यसलाई राख्नको लागि तयारी भइरहेको छ । प्याराफिट तर्फ तीन वटा ब्लकको काम सकिएको छ भने एउटा ब्लकको ढलान बाँकी छ । भीआइपी टावर एकको सबै भौतिक संरचना निर्माण गरिएको छ भने ट्रस र भित्री भागमा फिनिसिङको काम मात्र बाँकी छ ।