काठमाडौँ — आसिफ शेखको ९४ रनमा नेपालले क्रिकेट विश्वकप लिग २ मा ओमानलाई २ सय ५७ रनको लक्ष्य दिएको छ ।

टोलीको प्लेयिङ ११ मा फर्किएका आसिफले उत्कृष्ट ब्याटिङ गरेपछि मंगलबार त्रिवि अन्तर्राष्ट्रिय क्रिकेट मैदान कीर्तिपुरमा टस जितेर ब्याटिङ गरेको  नेपाल निर्धारित ५० ओभरको खेलमा ४९.५ ओभरमा २ सय ५६ रनमा अलआउट भयो ।

कमजोर प्रदर्शनका कारण अघिल्लो खेले खेलेको नेपाली टोलीमा हटाइएका आसिफले ९७ बल खेली ७ चौका र ५ छक्का प्रहार गरे । एकदिवसीय अन्तर्राष्ट्रियमा यो उनको दोस्रो उच्च स्कोर हो । उनी बाउन्ड्री लाइनमा क्याच भएपछि दोस्रो शतक बनाउन चुकेका थिए ।

ओमानले पहिलो ओभर नै स्पिनरबाट सुरु गरेको थियो । देव्रेहाते स्पिनर सकिल अहमदले पहिलो ओभर मेडन फालेपछि जितेन रमानन्दीले दोस्रो ओभरको पहिलो बलमै विनोद भण्डारीलाई शुन्यमा क्याच गराए । त्यसपछि आसिफ र अर्जुन कुमालले दोस्रो विकेटमा १ सय २३ रनको साझेदारी गरे । दोस्रो खेल खेलिरहेका अर्जुनले ४८ रन बनाए । उनले ८७ बल खेली ४ चौका प्रहार गरे । 

२८ औं ओभरमा क्रिजमा आएका कप्तान रोहित पौडेल ९ रनमा आउट भए । गुलशन झाले २३ बल खेली २ चौकासहित १७ रन बनाए । उपकप्तान दीपेन्द्रसिंह ऐरीले ३३ रन जोडे । उनले ४२ बल खेली १ चौका प्रहार गरे । तर करण केसी पहिलो बलमै आउट भए भने नन्दन यादव २ र सन्दीप लामिछाने १ रनमा आउट भए ।

आरिफ शेख अन्तिममा आउट भए । उनले २३ बलमा ४३ रन बनाए । उनले अन्तिम ओभरमा हसनाइन साहलाई लगातार तीन छक्का प्रहार गरेका थिए । ओमानबाट नदिम खानले विकेट लिए । उनले १० ओभरमा ४१ रन खर्चे । साह र सकिलले २–२ विकेट लिए ।