काठमाडौं — कविता कुँवरले ह्याट्रिकसहित ६ विकेट लिएपछि पहिलो संस्करणको आईसीसी वुमन्स च्यालेन्ज ट्रफीमा नेपाली टोली उपविजेता बन्ने सम्भावना बलियो भएको छ ।

नेपालले रुवान्डामा भइरहेको प्रतियोगितामा बिहीबार भानुआटुलाई ८३ रनको फराकिलो अन्तरले पराजित गरेपछि अंकतालिकामा दोस्रो स्थानमा उक्लेको छ ।

डबल राउन्ड रोबिनका आधारमा भइरहेको ५ राष्ट्र सहभागी प्रतियोगितामा अमेरिका ७ खेलमा १२ अंक जोडेर यसअघि नै विजेता बनिसकेको छ । अमेरिकाले बिहीबारै पहिलो खेलमा इटालीलाई ९ विकेटले पराजित गरेपछि विजेता बन्ने निश्चित गरेको थियो । अमेरिकाले विजेता बन्नेक्रममा दुवै खेलमा नेपाललाई हराएको थियो ।

नेपाल र आयोजक रुवान्डाको ७ खेलमा समान ८ अंक छ । १ खेल खेल्न बाँकी रहेको अवस्थामा रुवान्डाभन्दा नेपाल धेरै अगाडि छ । इटालीको ७ खेलमा ६ अंक र सबै ८ खेल खेलिसकेको भानुआटुको २ अंक छ । भानुआटुले पहिलो चरणमा नेपालमाथि २२ रनको सनसनीपूर्ण विजय हात पार्दै यो २ अंक जोडेको थियो ।

तर किगालीस्थित गहन्गा क्रिकेट रंगशाला ओभलमा यसपालि भानुआटुलाई कुनै मौका दिएन । टस जितेर ब्याटिङ रोजेको नेपालले निर्धारित २० ओभरमा ३ विकेट गुमाई १ सय ३२ रन बनायो । जबाफमा भानुआटुलाई १६.४ ओभरमा ४९ रनमा अलआउट गर्दै नेपालले शक्तिशाली विजय हात पारेको हो ।

नेपालले ब्याटिङक्रम परिवर्तन गर्दै विन्दु रावलको स्थानमा पूजा महतोलाई सम्झना खड्कासँगै ओपनिङ ब्याटिङमा पठाएको थियो । पूजा र सम्झनाले आक्रामक ब्याटिङ गर्दै नेपाललाई पहिलो ६ ओभरको पावर प्लेमा विनाक्षति ४० रनमा पुर्‍याए । पूजा २० बल खेल्दै १ छक्का प्रहार गर्दै १९ रनमा आउट भइन् ।

तेस्रो नम्बरमा आएकी विन्दु २४ बल खेल्दै ७ रनमा ‘रिटायर्ड हर्ट’ भइन् । अघिल्लो खेलमा अर्धशतक बनाएकी रुबि पोदार १ रनमा आउट भइन् । ओपनर सम्झनाले ५२ रन बनाइन् । उनले ५१ बल खेल्दै ९ चौका प्रहार गरिन् । महिला ट्वान्टी–२० अन्तर्राष्ट्रियमा यो उनको दोस्रो अर्धशतक हो । यसअघि उनले सन् २०२४ मा महिला एसिया कपमा यूएईविरुद्ध श्रीलंकाको दाम्बुलामा अविजित ७२ रन बनाएकी थिइन् ।

कप्तान इन्दु बर्मा ४३ र कविता कुँवर ६ रनमा अविजित रहे । इन्दुले १८ बलमा ७ चौका प्रहार गरिन् । उनले इनिङ्सको अन्तिम ३ बलमा रचेल एन्ड्रयुलाई लगातार तीन चौका प्रहार गरिन् । भानुआटुबाट रचेल, नतालिया काकोर र नासिमाना नाभाइकाले १–१ विकेट लिए ।

जबाफमा आएको भानुआटु कविताको बलिङमा तहसनहस भयो । उनले सबै ६ विकेट बोल्ड गरेर लिएकी हुन् । उनले १६ औं ओभरमा लगातार तीन बलमा विकेट लिँदै ह्याट्रिक विकेट लिएकी थिइन् । नेपालबाट ट्वान्टी–२० अन्तर्राष्ट्रियमा सर्वाधिक विकेट लिने खेलाडी कविताले ३.४ ओभरमा १ मेडन राख्दै ५ रन खर्चिन् ।

महिला ट्वान्टी–२० अन्तर्राष्ट्रियमा नेपाली खेलाडीको यो दोस्रो उत्कृष्ट बलिङ हो । यसअघि अञ्जली चन्दले सन् २०१९ पोखरामा भएको १३ औं दक्षिण एसियाली खेलकुदमा माल्दिभ्सविरुद्ध २.१ ओभरमा कुनै रन नखर्ची ६ विकेट लिएर तत्कालीन समयमा विश्व कीर्तिमानी बलिङ गरेकी थिइन् ।