काठमाडौँ — नेपालले आईसीसी वुमन्स च्यालेन्ज ट्रफीमा मंगलबार घरेलु टोली रुवान्डालाई ३८ रनले पराजित गरेको छ । नेपालले रुवान्डामा भइरहेको प्रतियोगितामा ६ खेलमा तेस्रो विजय निकालेको हो । नेपाल अंक तालिकाको तेस्रो स्थानमा छ ।नेपाल प्रतियोगिताको पहिलो दिनको खेलमा पनि अमेरिकासँग ४४ रनले पराजित भएको थियो । त्यसपछि नेपालले इटालीलाई ५० रनले र आयोजक रुवान्डालाई २ विकेटले पराजित गरेको थियो । नेपाल शुक्रबार भानुआटुसँग २२ रन र आइतबार अमेरिकासँग ७ विकेटले पराजित भएको थियो ।

मे १ सम्म हुने ५ राष्ट्र सहभागि प्रतियोगिता डबल राउन्ड रोबिनका आधारमा भइरहेको छ । नेपालले अव बिहीबार भानुआटु र शुक्रबार इटालीसँग खेल्ने छ । अमेरिका ६ खेलमा १० र रुवान्डा ७ खेलमा ८ अंक बोकी पहिलो दुई स्थानमा छन् । 

कप्तान इन्दु बर्माले अविजित ३३ रन बनाएपछि टस जितेर ब्याटिङ रोजेको नेपालले किगाली स्थित गहन्गा क्रिकेट रंगशाला ओभल बी मा ७ विकेट गुमाई १ सय ३ रन बनायो । कप्तानी इनिङ्स खेल्नेक्रममा इन्दुले ४५ बल खेली ४ चौका प्रहार गरिन् । सम्झना खड्का ६, विन्दु रावल २, पुजा महतो ५ र रुबि पोदार ६ रनमा आउट भएपछि नेपाल ५.१ ओभरमा २३–४ को अवस्थामा पुगेको थियो । 

त्यसपछि इन्दु र कविता कुँवरले पाँचौं विकेटमा ४६ रनको साझेदारी गरे । कविताले २६ बल खेली ४ चौका प्रहार गर्दै २४ रन बनाइन् । कविता र रोमा थापा (०) लगातार बलमा आउट भए । पूर्व कप्तान रुविना क्षेत्रीले १२ बल खेली २ चौका प्रहार गर्दै ११ रन बनाइन् । रचना चौधरी १ रनमा अविजित रहिन् । रुवान्डाकी हेनरीलिटे इसिमवेले विकेट लिइन् । उनले ४ ओभरमा २० रन खर्चिन । कप्तान मारी बिमेनयिमानाले ४ ओभरमा १७ रन खर्चेर २ विकेट लिइन् ।