त्रिवि अन्तर्राष्ट्रिय क्रिकेट रंगशाला कीर्तिपुरमा टस जितेर ब्याटिङ गरेको नेपालले १८.५ ओभरमा १ सय २२ रन बनाएको अवस्थामा खेल वर्षाले बिथोलिएको थियो ।
काठमाडौँ — नेपालले पहिलो ट्वान्टी–२० अन्तर्राष्ट्रियमा यूएईलाई १० ओभरमा ७८ रन बनाउनु पर्ने लक्ष्य दिएको छ । त्रिवि अन्तर्राष्ट्रिय क्रिकेट रंगशाला कीर्तिपुरमा खेलेको पहिलो अन्तर्राष्ट्रिय क्रिकेटमा टस जितेर ब्याटिङ गरेको नेपालले १८.५ ओभरमा १ सय २२ रन बनाएको अवस्थामा खेल वर्षाले बिथोलिएको थियो ।
त्यसपछि खेल प्रभावित हुँदा यूएईलाई १० ओभरमा नयाँ लक्ष्य दिइएको हो ।
दीपेन्द्रसिंह ऐरीको कप्तानीमा नेपालले ट्वान्टी–२० अन्तर्राष्ट्रियमा पहिलो खेल खेलेको हो । तर, नेपालले घरेलु मैदानमा ठूलो स्कोर बनाउन सकेन । दीपेन्द्र ट्वान्टी–२० अन्तर्राष्ट्रियमा नेपालका पाँचौं कप्तान हुन् । दीपेन्द्रलाई रोहित पौडेलको स्थानमा नेपालको नेतृत्वको जिम्मेवारी दिइएको हो ।
दीपेन्द्रले नेपालबाट सर्वाधिक ३२ रन बनाए । उनी खेलिरहेको अवस्थामा वर्षाले खेल बिथोलेको थियो । उनले ३५ बल खेल्दै २ चौका प्रहार गरेका थिए । उनीसँगै सन्दीप लामिछाने २ रनमा क्रिजमा थिए ।
चार वर्षपछि नेपालको ट्वान्टी–२० अन्तर्राष्ट्रिय टोलीमा फर्किएका अर्जुन साउद ११ बल खेली ३ चौका प्रहार गर्दै १३ रनमा आउट भए । उनका ओपनिङ जोडी कुशल भुर्तेल १६ रनमा रनआउट भए । उनले ९ बल खेल्दै समान १ चौका र छक्का प्रहार गरे । यस बीचमा सन्दीप जोरा ६ रनमा आउट भएका थिए ।
कमजोर फर्मका कारण २ महिना अघि भारतमा भएको ट्वान्टी–२० विश्वकप गुमाएका कुशल मल्लले १७ रन बनाए । जुहेब जुबेरको एलबीडब्लु आउट भएका उनले २१ बल खेली १ चौका प्रहार गरे । अर्का देब्रेहाते ब्याटर बसिर अहमद ११ बल खेली १ चौका प्रहार गर्दै १४ रनमा आउट भए । गुलशन झा ७ बल खेली रनमा एलबीडब्लु आउट भए ।
नन्दन यादवले लेगब्रेक बलर मोहम्मद जुहेबलाई एकै ओभरमा २ छक्का प्रहार गरे । उनले ७ बलमा १३ रन बनाई जुहेबको बलमा आउट भए । शेर मल्ल शून्यमा आउट भए ।
जुहेबले ४ ओभरमा २९ रन खर्चेर ३ विकेट लिए । जुनाइद सिद्धिकीले ओभरमा १८ रन खर्चेर २ विकेट लिए । मोहम्मद इरफानले ४ ओभरमा २० र हैदर अलीले ४ ओभरमा ३२ रन खर्चेर १–१ विकेट लिए ।
