नेपालगञ्ज — खजुरामा सम्पन्न एमटी एरिना प्रथम खजुरा गोल्ड कप फुटबल प्रतियोगिताको उपाधि नाइजेरियन जोन क्लब नाइजेरियाले हात पारेको छ ।

खजुरा–४ डिगाउँस्थित मिनी रंगशालामा आइतबार भएको फाइनल खेलमा नाईजेरियन टोलीले जेबीएम क्लब लखनउ भारतलाई शून्यकाविरुद्ध ४ गोल अन्तरले पराजित गर्दै उपाधि हात पार्न सफल भएको हो ।

नाईजेरियन टोलीले उपाधिसँगै ७ लाख नगद र ट्रफी पाएको छ भने उपविजेता जेबीएम क्लब लखनउ भारतले ४ लाख नगद र ट्रफी हात पारेको छ ।

नाइजेरियाका जर्सी नम्बर ३ का कलव कोनले दोस्रो हाफको ३४ र ४०औं मिनेटमा गोल गरे । यसैगरी, जर्सी नम्बर २४ का एडवार्ड थोमसले दोस्रो हाफको १९ र जर्सी नम्बर २६ का ओलावी अफिजले २४ मिनेटमा गोल गरेका थिए । प्रतियोगितामा नाइजेरियाका खेलाडीहरू गोलरक्षक लेकन शितु, उत्कृष्ट रक्षक र म्यान अफ द म्याच बिल्गो, एडवार्ड प्लेयर अफ द पिस घोषित भए ।