नेपालगन्ज — विदेशी टोली नाइजेरियन जोन क्लब प्रथम खजुरा गोल्डकपको सेमिफाइनलमा प्रवेश गरेको छ । यससँगै प्रतियोगिताको सेमिफाइनल समीकरण पनि पूरा भएको छ । 

यसअघि गोर्खा ब्वाइज स्पोर्ट्स क्लब बुटवल, फोर ब्रदर्स एफसी नवलपरासी र जेबीएम फुटबल एकेडेमी लखनउ सेमिफाइनलमा प्रवेश गरेका छन् । 

बाँकेको खजुरामा जारी एमटी एरिना प्रथम खजुरा गोल्डकप फुटबल प्रतियोगितामा नाइजेरियन जोन क्लब सशस्त्र प्रहरीको एपीएफ क्लबलाई ३–० गोल अन्तरले हराउँदै सेमिफाइनलमा प्रवेश गरेको हो ।

खेलका ‘म्यान अफ द म्याच’ दुई गोल गरेका नाइजेरियन खेलाडी ताजुदिन अकिनसोलालाई खजुरा गाउँपालिका अध्यक्ष डम्बरबहादुर विकले १० हजार रुपैयाँसहित पुरस्कृत गरे । न्यु डाँफे स्पोर्ट्स क्लबको आयोजनामा सोमबारदेखि प्रतियोगिता सुरु भएको हो ।