सुनसरी — विभागीय टिम नेपाल पुलिस क्लबलाई पराजित गर्दै झापा–११ फुटबल क्लब विराट गोल्डकपको फाइनलमा प्रवेश गरेको छ ।

विराटनगरस्थित सहिद मैदानमा बुधबार भएको पहिलो सेमिफाइनलमा पुलिस क्लबलाई १–० गोल अन्तरले स्तब्ध पार्दै झापाले उपाधि भिडन्त पक्का गरेको हो । झापाको जितमा फागुराम थारूले गरेको गोल नै निर्णायक बन्यो । उनले खेलको ६७औं मिनेटमा जाली चुमाउँदा झापाको जित सुनिश्चित बनेको हो ।

खेलको प्यलेर अफ द म्याद झापा–११ का स्वलोमन किङ भए । उनले नगद ११ हजार पाए ।

खेलको पहिलो हाफ भने गोलरहित बराबरीमा सकिएको थियो । सुरुवाती समयमा पुलिसले झापालाई दबाबमा राखे पनि आधा दर्जनभन्दा बढी अवसरलाई सदुपयोग गर्न सकेन । १८ औं मिनेटमा पुलिसका सञ्जीव लामाको प्रहार बाहिरिएको थियो भने लगत्तै प्रज्वल चौधरीको प्रहारले पनि दिशा लिन सकेन ।