जनकपुर — सुदूरपश्चिम प्रदेशलाई ४५ रनले पराजित गर्दै नेपाल एपीएफ क्लबले आफ्नो विजयी यात्रा कायम राखेको छ ।

प्रधानमन्त्री (पीएम) कप एकदिवसीय पुरुष राष्ट्रिय क्रिकेट प्रतियोगिताअन्तर्गत सोमबार जनकपुरस्थित प्रस्तावित रामजानकी बहुउद्देश्यीय अन्तर्राष्ट्रिय रंगशालामा भएको खेलमा एपीएफ क्लबले पूरै ५० ओभर खेल्दै ९ विकेटको क्षतिमा २ सय ५९ रन बनाएको थियो । 

एपीएफका ओपनर व्याटर दीपक बोहराले ६८ बलमा ४६ रन बनाएका थिए । अर्का ओपनर ब्याटर आशिफ शेख ५ बलमा १ रन बनाउँदै क्याच आउट भए । यस्तै, कप्तान रोहित पौडेलले ३१ बल खेल्दै ११ रनमा आउट भए । त्यसपछि मैदानमा उत्रिएका सन्दीप जोराले ४५ बलमा ५५ रन बनाएका थिए । जोरा र बोहराको साझेदारी टिकेको थियो । 

एपीएफका अर्का व्याटर सुमित महर्जनले ५१ बलमा ४१ रन बनाए । लोकेश बमले ४० बलमा ४७ रन जोडे । अमरसिंह रतौलाले १२, कमलसिंह ऐरीले १३, अभिषेक गौतमले ८, पुरन विकले ८ र युवराज खत्रीले ५ रन बनाएका थिए । एपीएफ क्लबले १२ रन अतिरिक्त पाएको थियो । 

सुदूरपश्चिमका बलर हेमन्त धामीले ९ ओभरमा ४९ रन दिँदै १ विकेट लिए । अर्का बलर विकास अग्रीले ८ ओभरमा ४३ रन खर्चिँदै २ विकेट, अशोक धामीले १० ओभर फ्याक्दै ४५ रन दिएर २ विकेट, शेर मल्लले १० ओभरमा ४५ रन दिएर ३ विकेट र नरेन भट्टले १ ओभरमा ४ रन दिँदै १ विकेट लिएका थिए । 

१ सय ६० रनको बिजयी लक्ष्य लिएर मैदानमा उत्रिएको सुदूरपश्चिमले ४६.२ ओभरमा सबै विकेट गुमाएर २ सय १४ रन बनायो । नेपाल एपीएफ क्लबसँग ४५ रनले पराजित हुनुअघि सुदूरपश्चिमका कप्तान शेर मल्ल र विकास अग्रीको साझेदारीले राम्रो रन बटुले पनि मल्ल रनआउट हुनपुगे ।