पोखरा — भुवन नगरकोटीले सूर्य नेपाल वेस्टर्न ओपनको उपाधि जितेका छन् । सूर्य नेपाल गल्फ टुरको पाँचौं तथा २६ औं संस्करणको सूर्य नेपाल वेस्टर्न ओपनमा शुक्रबार इभन–पार ६९ खेलेका भुवनले समग्रमा ३–अन्डर २ सय ४ को स्कोरमा सञ्जय लामालाई एक स्ट्रोकले हराउँदै उपाधिमा ह्याट्रिक गरे ।

करियरको १४ औं उपाधिसँगै उनले नगद १ लाख ७० हजार प्राप्त गरे । यसअघि यो सिजनमा उनले सूर्य नेपाल एनपीजीए टुर च्याम्पियनसिप र सूर्य नेपाल काठमाडौं ओपनको उपाधि जितेका थिए । भुवनसँग अन्तिम १८ होलको खेल सकिँदा मात्र १ स्ट्रोकको अग्रता थियो । तर शुक्र र जयरामले सुरुआतदेखि नै खेल बिगार्दा भुवनलाई सजिलो भयो ।

दिनको खेलमा ४–अन्डर ६५ खेल्दै समग्रमा २–अन्डर २ सय ५ को स्कोरमा सञ्जय दोस्रो भए । उनले नगद १ लाख २५ हजार हात पारे । एमेच्योर राहुल विश्वकर्माले ४–अन्डर ६५ को स्कोरकार्ड बनाए । समग्रमा १–अन्डर २ सय ६ सहित तेस्रो भए ।

धरानका गल्फर शुक्रबहादुर राईले ४–ओभर ७३ मा अन्तिम दिनको खेल सकाउँदा समग्रमा २–ओभर २ सय ९ सहित चौथो भए । प्रोतर्फ तेस्रो भएका उनले नगद १ लाख आफ्नो नाममा लेखाए । जयराम श्रेष्ठले ६–ओभर ७५ मा अन्तिम दिनको खेल सकाउँदा समग्रमा ७–ओभर २ सय १४ सहित पाँचौं स्थानमा चित्त बुझाए । उनले ८२ हजार प्राप्त गरे ।

पोखराका घरेलु गल्फर भुबहादुर गुरुङ छैटौं भए । उनले समग्रमा ८–ओभर २ सय १५ स्कोर बनाए । शुक्रबारको खेल ३–ओभर ७२ मा पूरा गरे । उनले नगद ७२ हजार पाए । समग्रमा १०–ओभर २ सय १७ सहित भुवनकुमार रोक्का र दिनेश प्रजापति संयुक्त रूपमा सातौं भए । भुवनले ३–ओभर ७२ र दिनेशले २–अन्डर ६७ को स्कोर निकाले । उनीहरूले समान ६५ हजार प्राप्त गरे ।