काठमाडौँ — इंग्लिस प्रिमियर लिगको प्रतिनिधित्व गर्दै लिभरपुलले युरोपेली च्याम्पियन्स लिगको अन्तिम आठ खेल्ने भएको छ । गालातासारेलाई एनफिल्डमा बुधबार सजिलै ४–० ले पराजित गर्दै उसले समग्रमा ४–१ को अग्रता लिएको हो ।

लिभरपुलका लागि डोमिनिक सबोसलाई, ह्युगो एकिटिके, रायन ग्रेभेनवेर्च र मोहमद सलाहले गोल गरे । तर टोटनहम र न्युकासल युनाइटेड भने प्रतियोगिताबाट बाहिरिने अन्य इंग्लिस क्लब भएका छन् ।

टोटनहमले बुधबार अन्तिम १६ को दोस्रो लेगको खेलमा एटलेटिको म्याड्रिडलाई ३–२ ले हराए पनि समग्रमा ७–५ ले पछाडि परेको हो । टोटनहमका लागि त्यस खेलमा जाभी सिमोन्सले दुई गोल गरे । बार्सिलोनाले न्युकासल युनाइटेडमाथि ७–२ को जित निकाल्दै समग्रमा ८–३ को निर्णायक अग्रता लिन सफल रह्यो । बार्सिलोनाका लागि राफिन्हा, लामिन यामल र रोबर्ट लेवनडोस्कीले दुई दुई गोल गरे ।