काठमाडौँ — राष्ट्रिय लिग फुटबलको उपाधि कसले जित्ने हो, अहिलेसम्म त्यसको छनक नै छैन । तर यही प्रतियोगिताको सबैभन्दा पुछारमा कुन टिम रहने हो, सम्भवतः त्यसको भने टुंगो लागेको छ । 

सातदोबाटोस्थित एन्फा कम्फ्लेक्समा मंगलबार नव जनजागृति र काँत्रेबिहार भिड्दा त्यो त्यस्तो खेल रहने निश्चित जस्तै थियो, जसले लिगमा सहभागी १७ टिममध्ये अन्तिम स्थानमा रहने टिमको निर्णय गर्नेछ । 

त्यतिमात्र होइन, यो दुई त्यस्ता टिमको खेल थियो, जसले त्यसअघि एउटै जित निकाल्न सकेको थिएन । त्यही खेलमा नव जनजागृति २–१ ले विजयी रह्यो । यो जितले टोलीको ४ अंक भएको छ । नव जनजागृति ११ औं खेलमा आइपुग्दा पहिलो खुसीको जित निकाल्न सफल रह्यो । संयोग कस्तो रह्यो भने जनजागृतिको खाताको ४ अंक पछिल्ला २ खेलमै प्राप्त भएको हो । यसअघि नव जनजागृतिले सातदोबाटो युवालाई बराबरीमा रोकेको थियो ।