काठमाडौँ — त्रिभुवन आर्मी क्लबले सोमबार राष्ट्रिय लिग फुटबलमा त्यस्तो जित निकालेको छ, जसले प्रतियोगिताको उपाधि होड खुला भएको छ । यो जितपछि आर्मीले पनि उपाधिमाथि आफ्नो दाबी प्रस्तुत गरेको छ । यसका लागि दशरथ रंगशालामा भएको खेलमा आर्मीले लिग तालिकाको शीर्षस्थानमा रहेको मछिन्द्र एफसीलाई २–१ ले हरायो । विभागीय टिम आर्मीले यो खेल नजितेको भए उपाधि होडबाट लगभग बाहिरिने स्थितिमा पुग्थ्यो । 

अब आर्मीको ११ खेलबाट २३ अंक भएको छ । हारका बावजुद गोल अन्तरमा मछिन्द्र अझै पनि २५ अंकसहित पहिलो स्थानमा छ । त्यस पछाडि एपीएफ क्लबको २५ अंक छ । खेलपछि आर्मीको प्रशिक्षक बालगोपाल महर्जनले भने, ‘यो खेल हामीलाई जसरी पनि जित्नु थियौं, त्यसैले त्यही रणनीतिमा खेल्यौं । यो जितका लागि खुसी छौं, किनभने हामी फेरि उपाधि होडमा फर्कन सफल रह्यौं । खेल आफैंमा बराबरीको रह्यो, मछिन्द्र कम्तीको रहेन ।’

खेल आफैंमा वर्षा र हुरीका कारण आधा घण्टा ढिला सुरु भएको थियो । पहिलो हाफमै फ्लडलाइटमा गडबडी आएपछि थप १० मिनेट जति रोकिएको थियो । वर्षाले गर्दा मैदान पनि स्वभाविक स्वरुपमा थिएन । त्यसैले दुवै टिमका खेलाडीलाई गाह्रो भएको थियो । तर खेलमा रोमाञ्चको भने कमी रहेन । ‘हामी पराजित रह्यौं र दुवै गोलमा हाम्रै कमजोरी रह्यो,’ मछिन्द्रका प्रशिक्षक प्रवेश कटुवालले भने । उनले थपे, ‘यो नतिजापछि उपाधि होड खुला भएको छ । आज जितेको भए, हामीलाई धेरै फाइदा हुन्थ्यो । अब हामीले अन्य खेलका नतिजामा पनि ध्यान दिनुपर्नेछ । वर्षाले प्रभावित मैदानमा हाम्रा खेलाडीलाई अझ गाह्रो भयो ।’ 

प्रतियोगितामा मछिन्द्रले अझै पनि एपीएफविरुद्ध खेल्न बाँकी छ । सम्भवतः यसकै नतिजा उपाधि होडमा निर्णायक साबित हुन सक्नेछ । आर्मीले भने नवयुग श्रेष्ठको गोलमा ४० औं मिनेटमा अग्रता लिएको थियो, तर यो लामो समय टिकेन । 

जोनाथन एडुवार्डोले ४३ औं मिनेटमा बराबरी गोल फर्काए । दोस्रो हाफ सुरु भएलगत्तै जिलेस्पीजंग कार्कीले ४६ औं मिनेटमा आर्मीका लागि दोस्रो गोल गरे र यो नै अन्ततः निर्णायक साबित भयो । आर्मीले यसै खेलका लागि भनेर भेट्रान भरत खवासलाई मैदान उतारेको थियो । उनको आगमनसँगै टिममा उत्साह र समन्वय फर्केको प्रशिक्षक महर्जनले दाबी गरे । भरतलाई हङकङविरुद्धको खेलका लागि घोषित सुरुआती टिममा पनि समावेश गरिएको छ । 

लालीगुराँसको जित

लालीगुराँसले दशरथ रंगशालामा भएको दिनको दोस्रो खेलमा प्लानिङ ब्वाइजको पुनरागमन रोक्दै ३–२ को जित रच्यो । यो नतिजाले जहाँ लालीगुराँसलाई उपाधिका लागि भिड्ने अवसर तयार भएको छ, त्यहीं प्लानिङको उपाधि सम्भावना लगभग टुंगिएको स्थिति रह्यो । २० औं मिनेटमा राज भुसाल र २४ औं मिनेटमा एकोटे जुनियरले गोल गरेपछि २–० ले लालीगुराँस अगाडि रह्यो । 

यस्तोमा लालीगुराँसको जित निश्चित जस्तै देखिएको थियो । तर प्लानिङले हार मानेन र टोलीका लागि रोमन भुजेलले ५७ तथा साहिल केसीले ७३ औं मिनेटमा एक–एक गोल फर्काए । यस्तोमा के तय देखिएको थियो, अब यो खेल बराबरीमा टुंगिनेछ । तर ८३ औं मिनेटमा आशिष गुरुङले निर्णायक गोल गर्दै लालीगुराँसको जित निश्चित गरे ।

यो जितपछि लालीगुराँसको २४ अंक भएको छ र तेस्रो स्थानमा उक्लेको छ । अहिलेसम्म अपराजित पोखरेली टिमले ४ खेलको लगातार बराबरीपछि यो जित निकालेर आफूलाई उपाधिको प्रत्याशी बनाएको हो । ‘यो खेल हामीले जित्नका लागि खेलेको थियौं, अब हाम्रो उद्देश्य उपाधिकै लागि आक्रामक भएर खेल्नु हुनेछ,’ लालीगुराँसका प्रशिक्षक किरण श्रेष्ठले भने । ‘लगातार बराबरीपछि हामीलाई जित नै आवश्यक परेको थियो,’ प्रशिक्षक श्रेष्ठले थपे, ‘त्यसै अनुसार खेलाडीले खेले ।’ हारले प्लानिङ भने २२ अंकमै सीमित रह्यो । खेलको अन्त्यतिर प्लानिङ १० खेलाडीमा सीमित थियो, जतिबेला निङ्मा घिसिङ रातो कार्ड खाएर मैदान छाड्न बाध्य रहे । खेलपछि प्रशिक्षक सञ्जित सिंहले भने, ‘यो हारले हामीलाई गाह्रो स्थिति तयार भएको छ ।’