काठमाडौँ — २० औं एसियाली खेलकुदको प्रवर्द्धनका लागि शनिबार ‘एसियन गेम्स फन रन’ हुन भएको छ । नेपाल ओलम्पिक कमिटी (एनओसी) ले ओलम्पिक काउन्सिल अफ एसिया (ओसीए) को कार्यक्रमअन्तर्गत नेपालमा पनि एसियन गेम्स फन रन आयोजना गर्न लागेको हो ।

२० औं एसियाली खेलकुद जापानको आइची/नागोया सहरमा सेप्टेम्बर १९ देखि अक्टोबर ४ सम्म हुनेछ । प्रत्येक चार वर्षमा हुने एसियाडलाई उत्सवको रुपमा मनाउने क्रममा फन रन हुँदै आएको एनओसीले जनाएको छ । शनिबार बिहान ७ः३० बजे सातदोबाटोस्थित एनओसी मुख्यालयबाट फन रन सुरु हुनेछ । त्यसबाट विभिन्न स्थान हुँदै पाटन दरबार स्क्वायर पुगेर सकिनेछ । करिब ३ किलोमिटर दुरीमा हुने रुटमा सहभागीले पाटनका सम्पदा क्षेत्रको अवलोकन गर्ने अवसर पाउने जनाइएको छ ।