पेरिस — युरोपेली च्याम्पियन्स लिग फुटबलको अन्तिम १६ मा छ इंग्लिस टिम पुग्दा सबैले प्रिमियर लिग कति धेरै शक्तिशाली रह्यो भनेर चर्चा गरेका थिए । जतिबेला यही अन्तिम १६ को पहिलो लेगको खेल सकियो । चर्चाको विषय भएको छ, यी इंग्लिस टिमलाई भएको चाहिँ के रहेछ ?

म्यानचेस्टर सिटी र चेल्सी ठूलै अन्तरले पराजित भए । त्यसअघि लिभरपुल र टोटनहम पनि हारेकै थिए । प्रिमियर लिगको शीर्षमा रहेको आर्सनलले भने बायर लेभरकुजनलाई बराबरीमा रोकेको थियो, त्यो पनि अन्तिम मिनेटमा काइ हार्भटेजले पेनाल्टीबाट गरेको गोलको मदतबाट । लेभरकुजन त्यही टिम हो, जुन जर्मन बुन्डेसलिगाको छैटौं स्थानमा छ । आर्सनल लिग चरणका सबै ८ खेलमा विजयी थियो । टोटनहम भने एट्लेटिको म्याड्रिडको हातबाट नमज्जाले पराजित भयो । लिभरपुल पनि गालाटासारेसँग हारेको हो ।

सम्भवतः राम्रो प्रदर्शन त न्युकासल युनाइटेडकै रह्यो । टोलीले सेन्ट जेम्स पार्कमा भएको खेलमा बार्सिलोनालाई जित्न दिएन, बराबरी नतिजा निकाल्न सफल रह्यो । जतिबेला दोस्रो लेगको खेल हुनेछ, सबै प्रिमियर लिगका ६ टिमलाई असाध्यै राम्रो प्रदर्शन आवश्यकता पर्नेछ । न्युकासललाई छाडेर अरू भने प्रतिद्वन्द्वी टिमकै मैदानमा पाहुना बनेका थिए । यस्तोमा चेल्सी, सिटी र टोटनहमलाई आफ्नो घरमा तीन गोलले पछाडि रहेको स्थिति उल्टाउनुपर्नेछ ।

सायद अन्तिम आठमा पुग्ने आर्सनल र लिभरपुलको सम्भावना बढी छ । यी टोलीहरू प्रायः घरमा बलियो हुन्छन् र आफू पछाडि रहेको स्थितिबाट जित निकाल्न माहिर छन् । यसरी एकाएक इंग्लिस टिमको प्रदर्शन कति कमजोर रह्यो त ? कतै घरेलु प्रिमियर लिगको अत्यधिक दबाबले उनीहरूलाई गलाएको त छैन ? धेरैलाई के लागेको छ भने सम्भवतः बढी दबाब अचेल च्याम्पियन्स लिगमा भन्दा प्रिमियर लिगमै बढी हुन थालेको छ ।