गत साता दक्षिण कोरियासँग भएको खेलमा आफ्नो राष्ट्रिय गान गाउन अस्वीकार गरेका इरानीयन महिला फुटबल टिमका खेलाडीहरू आफ्नो देश फर्किएमा खतरा हुनसक्ने सम्भावनापछि अस्ट्रेलियाले मानवीय भिसा प्रदान गरेको छ ।
अस्ट्रेलिया — एसियन कप फुटबल प्रतियोगितामा भाग लिन अस्ट्रेलिया आएका इरानी महिला फुटबल टिमका ५ जनालाई अस्ट्रेलिया सरकारले शरण दिएको छ । गत साता दक्षिण कोरियासँग भएको खेलमा आफ्नो राष्ट्रिय गान गाउन अस्वीकार गरेका इरानीयन महिला फुटबल टिमका खेलाडीहरू आफ्नो देश फर्किएमा खतरा हुनसक्ने सम्भावनापछि अस्ट्रेलियाले मानवीय भिसा प्रदान गरेको छ ।
इरानी महिला फुटबल टिम एसियन कप प्रतियोगिता खेल्न करिब १ महिनाअघि अस्ट्रेलिया आएका थिए । सम्पूर्ण इरानी फुटबल टिमका खेलाडीलाई अस्ट्रेलियाले सहयोग गर्ने बताए पनि ५ खेलाडीले मात्र शरण लिने निर्णय गरेका थिए । अस्ट्रेलियाका अध्यागमनमन्त्री टोनी बर्कले उनीहरूको भिसा प्रक्रियालाई प्रमाणित गरेका हुन् । भिसा दिएपछि उनीहरूलाई सुरक्षित स्थानमा सारिएको मन्त्री बर्कले जानकारी दिए । बीबीसीका अनुसार शरण लिने खेलाडीमा फतेमा पासानडिडेह, जाहरा घानबारी, जाहरा सरबाली, अतेफे रामाजानजाडेह र मोना हमौदी छन् ।
अस्ट्रेलियाले मानवीय भिसा कार्यक्रमअन्तर्गत स्थायी सुरक्षासहित शरणार्थीका रूपमा सहयोग गर्ने गरेको छ । त्यसमा उनीहरूले बस्ने, अध्ययन गर्ने र काम गर्न पाउँछन् । अस्ट्रेलियाका प्रधानमन्त्री एन्थोनी अल्बानिजीले उनीहरू सुरक्षित रहेको र अस्ट्रेलियालाई आफ्नो घरका रूपमा सुरक्षित महसुस गर्न सक्ने बताएका छन् । अस्ट्रेलियाका विपक्षी दलका नेपाल एङ्गस टेलरले समेत सरकारको यो निर्णयप्रति समर्थन गरेका छन् ।
यसै विषयमा अमेरिकी राष्ट्रपति डोनाल्ड ट्रम्पले समेत प्रधानमन्त्री अल्बानिजीलाई सहयोग पुर्याउन आग्रह गरेका थिए । ट्रम्पले सामाजिक सञ्जालमा लेख्दै ५ जनालाई सहयोग पुर्याइसकेको जनाउँदै प्रधानमन्त्री अल्बानिजीले राम्रो काम गरेको उल्लेख गरेका छन् । अस्ट्रेलिया सरकारले इरानी फुटबल टिमका सबैलाई सहयोग पुर्याउने बताएको छ । प्रधानमन्त्री अल्बानिजीले सहयोग आवश्यक भए अस्ट्रेलियामा सहयोग उपलब्ध रहेको बताएका छन् ।
इरानीयन महिला फुटबल टिम खेलको सुरुवातमा राष्ट्रियगान नगाई चुप बसेका थिए । जसले अन्तर्राष्ट्रिय रूपमा सञ्चारमाध्यममा चर्चा पाएको थियो । उनीहरू फर्किएर गएमा असुरक्षित हुन सक्ने आशंकाबीच अस्ट्रेलियाले सहयोगको हात अघि बढाएको हो ।
