काठमाडौँ — अहमदाबाद (एएफपी)– भारतले आइतबार न्युजिल्यान्डलाई ९६ रनले पराजित गर्दै ट्वान्टी–२० विश्वकपको उपाधि जितेको छ । २ सय ५६ रनको विजय लक्ष्य लिएर आएको न्युजिल्यान्ड १९ ओभरमा १ सय ५९ रनमा अलआउट भयो । 

कामचलाउ स्पिनर अभिषेक शर्माले न्युजिल्यान्डका अन्तिम ब्याटर ज्याकोब डफीलाई आउट गरेपछि भारतको विजयले अहमदाबादस्थित नरेन्द्र मोदी रंगशालामा उपस्थित ८६ हजार समर्थकलाई खुसी बनाएको थियो । अधिकांश समर्थक भारतका रहेका थिए । भारत यही मैदानमा २०२३ को एकदिवसीय विश्वकप फाइनलमा अस्ट्रेलियासँग पराजित भएको थियो । न्युजिल्यान्ड यस पटक पनि फाइनलमा चुक्न पुग्यो । 

न्युजिल्यान्डले अझै सेतो बलमा विश्वकप जित्न सकेको छैन । २०२१ को फाइनलमा पनि टोली अस्ट्रेलियासँग पराजित भएको थियो । त्यस्तै न्युजिल्यान्ड २०१५ र २०१९ को एकदिवसीय फाइनलमा क्रमशः अस्ट्रेलिया र इंग्ल्यान्डसँग पराजित भएको थियो ।

न्युजिल्यान्डबाट ओपनर टिम सेइफर्टले २६ बल खेली २ चौका र ५ छक्कासहित ५२ तथा कप्तान मिचेल सान्टनरले ३५ बल खेली ३ चौका र २ छक्कासहित ४३ रन बनाए ।

प्लेयर अफ द फाइनल भारतका जस्प्रित बुमराहले ४ ओभरमा १५ रन मात्र खर्चेर ४ विकेट लिए । अक्षर पटेलले ३ ओभरमा २७ रन खर्चेर ३ विकेट लिए । 

उपाधि रक्षा गर्ने भारत पहिलो टोली भएको छ । दुई वर्षअघि वेस्ट इन्डिजमा भएको फाइनलमा भारतले दक्षिण अफ्रिकालाई पराजित गरेको थियो । साथै भारत ट्वान्टी–२० विश्वकप ३ पटक जित्ने पहिलो राष्ट्र पनि भएको छ ।

वेस्ट इन्डिज र इंग्ल्यान्डले २–२ पटक जितेका छन् । ट्वान्टी–२० विश्वकपको १० संस्करणमा पहिलो पटक घरेलु टोली विजेता बनेको हो । 

यसअघि सञ्जु सामसनले ४६ बलमा ८९ रन बनाएपछि टस हारेर ब्याटिङमा आएको भारतले निर्धारित २० ओभरमा ५ विकेट गुमाई २ सय ५५ रन बनाएको थियो । पछिल्ला दुई इनिङ्समा क्रमशः अविजित ९७ र ८९ रन बनाएका सामसनले ५ चौका र ८ छक्का प्रहार गरेका थिए । 

सामसन नै प्लेयर अफ द सिरिजमा चुनिए । उनले प्रतियोगितामा ३ सय २१ रन बनाएका थिए । ‘सपनाजस्तो भइरहेको छ, अत्यन्त खुसी र कृतज्ञ छु । शब्द छैन, भावना पनि छैन,’ अवार्ड लिएपछि उनले भने ।

उनलाई सुरुका खेलहरूमा खेलाइएको थिएन । तर पछि मध्यक्रमबाट रिंकु सिंहलाई निकालेर सामसनलाई ओपनरका रूपमा खेलाइएको थियो भने ईशान किसनलाई ओपनरबाट तेस्रो नम्बरमा पठाइएको थियो । 

भारतले ६ ओभरको पहिलो पावर प्लेमै बिनाक्षति ९२ रन जोडेर खेल आफ्नो पक्षमा ढल्काएको थियो । सामसन र अभिषेक शर्माले पहिलो विकेटमा ९८ रनको साझेदारी गरेपछि भारतले यस विश्वकपमा आफ्नो दोस्रो उच्च स्कोर बनाएको थियो । जिम्बावेविरुद्धको ‘सुपर एट’ को खेलमा पनि टोलीले २ सय ५८ रन बनाएको थियो । 

अभिषेकले २१ बलमा ५२ रन बनाए । देब्रेहाते स्पिनर रचिन रवीन्द्रको अफ स्टम्प बाहिर गएको बलमा आउट हुनुपूर्व उनले ६ चौका र ३ छक्का प्रहार गरे । प्रतियोगितामा यो उनको दोस्रो अर्धशतक हो ।

सामसन र ईशान किसन मिलेर पुनः न्युजिल्यान्डका बलरमाथि निर्मम प्रहार गरेका थिए । सामसनले रवीन्द्रलाई लगातार ३ छक्का प्रहार गर्दै प्रतियोगितामा आफ्नो तेस्रो अर्धशतक पूरा गरेका थिए । 

किसनले ५४ रन बनाए । उनले २५ बल खेली समान ४ चौका र छक्का प्रहार गरे । जिम्मी निसमले एकै ओभरमा ३ विकेट लिएका थिए । उनले सामसन, किसन र कप्तान सूर्यकुमार यादवलाई शून्यमा आउट गरेका थिए । तर त्योभन्दा अघि नै भारतले २ सय रनको स्कोरलाई उछिनिसकेको थियो । 

शिवम दुबेले अन्तिम ओभरमा निसमलाई ३ चौका र २ छक्का प्रहार गरेपछि भारतले २ सय ५० रनलाई उछिनेको थियो । दुबे ८ बलमा २६ रन बनाई अविजित रहे । भारतको ९६ रनको यस विजय ट्वान्टी–२० विश्वकपमा सबैभन्दा ठूलो रन अन्तरको विजय पनि हो । यसै विश्वकपमा भारतले नामिबियालाई ९३ रनले पराजित गरेको थियो ।