यसअघिका विश्वकपमा जस्तै भारतविरुद्ध पाकिस्तान कमजोर सावित भयो । कप्तान आगाले केही गम्भीर भूल पनि गरे । आगाले टस जितेर भारतलाई पहिले ब्याटिङको निम्तो दिएको थियो र यो अन्ततः गलत सावित भयो । पाकिस्तान त्यस खेलमा ६१ रनले पराजित रह्यो ।
What you should know
क्यान्डी (एएफपी) — पाकिस्तानको टी–२० विश्वकप यात्रामा पूर्णविराम लागिसकेको छ र त्यसको अर्थ हो, टिम सेमिफाइनल पुग्न सकेन । पाकिस्तानमाथि आरोप छ, उसले टी–२० क्रिकेटलाई नै बुझ्न सकेको छैन । कप्तान सलमान आगा नै टी–२० क्रिकेटको खेलाडी होइन भन्न सुरु भएको छ ।
त्यति मात्र होइन, एक त पाकिस्तानले यस विश्वकपमा सुस्त ब्याटिङ गरेको छ । त्यसमाथि टिमका अलराउन्डरले आक्रामक स्वभावको खेल ढाँचामा कमजोर प्रदर्शन गरेका छन् । पूर्वविकेटकिपर कमरन अकमललाई लाग्छ, भारत, वेस्ट इन्डिज, दक्षिण अफ्रिका र इंग्ल्यान्डजस्ता टिम अगाडि टी–२० क्रिकेटमा पाकिस्तानको स्तर धेरै पछाडि छ । उनी भन्छन्, ‘पाकिस्तानी टिम र खेलाडी टी–२० क्रिकेटका लागि उपयुक्त नै देखिएनन् । मलाई लाग्छ, पाकिस्तानी टिमले चन्द्रमामा खेलिरहेको थियो, जबकि हामी पृथ्वीमा छौं । हामीले कमजोर टिमलाई मात्र हरायौं, तर ठूला टिमविरुद्ध पराजित रह्यौं ।’
विश्वकप अगाडि पाकिस्तानले अस्ट्रेलियालाई घरमा भएको तयारी शृंखलामा ३–० ले हराएको थियो, त्यसैले टिम उत्साहित रहेको थियो । पाकिस्तानसँग बलरलाई मद्दत गर्न सक्ने श्रीलंकाली पिच सुहाउँदो स्पिन बलर पनि थिए । फेरि पाकिस्तानका सबै खेल श्रीलंकामै थियो । तर नेदरल्यान्ड्सविरुद्धको पहिलो खेलमै टोली दबाबमा परेको थियो । धन्न त्यस खेलमा पाकिस्तान तीन विकेटले विजयी रह्यो ।
यसको श्रेय गएको थियो, ११ बलमा २९ रन बनाएका फहिम असरफलाई । तर यसअघिका विश्वकपमा जस्तै भारतविरुद्ध पाकिस्तान कमजोर सावित भयो । कप्तान आगाले केही गम्भीर भूल पनि गरे । यो त्यही खेल थियो, जुन सुरुमा पाकिस्तानले बहिष्कार गर्ने भनेको थियो, तर पछि अन्तिम क्षणमा खेल्न तयार भएको थियो । आगाले टस जितेर भारतलाई पहिले ब्याटिङको निम्तो दिएको थियो र यो अन्ततः गलत सावित भयो । पाकिस्तान त्यस खेलमा ६१ रनले पराजित रह्यो ।
आगाले आफ्ना प्रमुख खेलाडी मिस्ट्री स्पिनर उसमन तारिकलाई ११ औं ओभरमा मात्र प्रयोगमा ल्याए । त्यति बेलासम्म इसान किसनले खेलमा निर्णायक सावित ७७ रन बनाइसकेका थिए र भारत विजयी सावित हुने स्कोर खडा गर्न सफल रहेको थियो । पाकिस्तानका अर्का पूर्वखेलाडी वासित अलीले प्रश्न गरेका छन्, ‘ब्याटिङका लागि सुहाउँदो पिचमा पाकिस्तानले किन पहिले बलिङ रोजेको थियो, त्यो बुझ्न गाह्रो छ । भारतले १ सय ७५ रनको स्कोर खडा गरेपछि पाकिस्तानी खेलाडी दबाबमा आए ।’
पाकिस्तानी कप्तानले इंग्ल्यान्डविरुद्ध तारिकलाई दोस्रो ओभर पनि दिएनन्, भलै उनले आफ्नो पहिलो ओभरमै विकेट लिएका थिए । नतिजा इंग्लिस कप्तान ह्यारी ब्रुक्सले निर्णायक सावित शतक बनाए । अकमल पनि मान्छन्, कप्तानका रूपमा उनी कमजोर सावित भए । उनी प्रशिक्षक माइक हेसन र छनोटकर्ता पनि उत्तिकै दोषी देख्छन् ।
उनी भन्छन्, ‘प्रशिक्षक हेन्सनले सही काम गर्न सकेनन् । उनीले त्यस्ता अलराउन्डर रोजे, जसलाई न ढंगले ब्याटिङ गर्न आउँथ्यो, न त बलिङ ।’ पाकिस्तानका लागि लय गुमाइसकेका बाबर आजममाथि विश्वास गर्नु पनि उत्तिकै गलत सावित भयो । उनको सुस्त ब्याटिङले टिमको लयमै समस्या उत्पन्न गरेको थियो । श्रीलंकाविरुद्धको अन्तिम खेलमा उनलाई टिममा समेत सामेल गरिएको थिएन । उनीबिना पाकिस्तानले दुई सय रनभन्दा माथिको स्कोर बनाएको थियो ।
तर त्यसको पनि अन्त्यमा अर्थ लागेन किनभने न्युजिल्यान्डले नेट रन रेटमा पाकिस्तानलाई पछाडि छोडेको थियो । विश्वकपमा पाकिस्तानको खेल हेर्न यूएईमा रहेको जागिर छाडेका एक पाकिस्तानी समर्थक सउद बलोचले भनेका छन्, ‘हामी सबै आजमका प्रशंसक नै हौं । तर उनले टी–२० क्रिकेटको मागअनुसार खेल्न सकेनन् । सबै पाकिस्तानी समर्थक यति बेला निराश मात्र छैनन्, धेरै रिसाइरहेका छन् । तर हामीलाई के पनि थाहा छ भने पाकिस्तानी क्रिकेटमा केही पनि फेरिने छैन र हामी भविष्यमा फेरि पनि दुःखित हुनेछौं ।’
