काठमाडौँ — चर्च ब्वाइज युनाइटेडले सहिद स्मारक लिग ‘ए’ डिभिजन विजेताका रूपमा के राष्ट्रिय लिग पनि जित्ने छ त ? यसको जवाफ अहिले नै दिन गाह्रो हुनेछ । तर चर्च ब्वाइजले लगातार दुई महत्त्वको खेल जितेर राष्ट्रिय लिग जित्ने सम्भावनामा पनि एउटा इँटा भने थपेको छ । चर्च ब्वाइज दशरथ रंगशालामा शनिबार फ्लडलाइटमा भएको खेलमा मछिन्द्र एफसीलाई १–० ले हराउन सफल रह्यो । घरेलु फुटबलको एउटा ‘हाइप्रोफाइल’ खेल हेर्ने दर्शक नगण्य नै थियो । 

यो खेलले दिनुपर्ने सनसनी र तनाव भने कम्तीको रहेन । खेलको समाप्तिमा चर्च ब्वाइजका प्रशिक्षक र खेलाडीले जसरी खुसी मनाए, त्यसले पनि देखाउँछ, यो जित कति महत्त्वको रह्यो भनेर । खेलका नायक रहे, नाइजेरियाली २५ वर्षीय खेलाडी अबायोमी फकुन्ले । दोस्रो हाफमा मछिन्द्रमाथि चर्च ब्वाइज लगभग हाबी रह्यो र त्यसकै फाइदा उठाएर फकुन्लेले पेनाल्टी एरियाबाट शक्तिशाली प्रहार गर्दै ७४ औं मिनेटमा आकर्षक गोल गरेका थिए । 

कम बोल्ने र लजालु स्वभावका फकुन्लेको यस गोललाई लिएर छोटो प्रतिक्रिया थियो, ‘जसरी गोल हुनुपर्ने थियो, त्यसरी नै भयो ।’ तर प्रशिक्षक सुमन श्रेष्ठले भने उनको प्रशंसा नै गरे । फेरि यी प्रशिक्षकका लागि यी लागोस सहरका विङ्गर प्रिय छन् । प्रशिक्षक श्रेष्ठ भन्छन्, ‘उनी निकै मिहिनेती खेलाडी हुन् । कडा परिश्रम गर्छन् । भलाद्मी पनि छन् ।‘ प्रशिक्षक श्रेष्ठ यो जितमा उत्तिकै उत्साही पनि रहे । 

आफ्नो पछिल्लो खेलमा त्रिभुवन आर्मी क्लबलाई पनि हराएको चर्च ब्वाइजले अहिले मछिन्द्रलाई पनि पन्छाएर दुई ठूला खेलबाट अधिकतम ६ अंक बटुलेको छ । प्रशिक्षक श्रेष्ठ पोस्टम्याच कन्फ्रेन्समा भने, ‘पोखरामा हाम्रो खेल योजनाअनुसार रहेन । तर अहिले त्यहाँबाट फर्केयता सबै खेलाडीले राम्रो खेलेका छन् ।’ यो जितले चर्च ब्वाइजको ७ खेलबाट १६ अंक भएको छ । यो टोलीको लगातार पाँचौं जित हो । 

अर्कोतर्फ मछिन्द्रको भने प्रतियोगितामा पहिलो हार बेहोर्ने क्रममा १६ अंकमै सीमित रह्यो । हारको विश्लेषण गर्दै मछिन्द्रका प्रशिक्षक प्रवेश कटुवालले भने, ‘चर्च ब्वाइज बलियो टिम हो र यसका खेलाडी स्तरीय छन् । त्यसैले यो बलियो प्रतिद्वन्द्वी हो । तर आजको खेलमा जुन गोल भएको छ, त्यसमा हाम्रा खेलाडीको प्राविधिक त्रुटि रह्यो । तर प्रतियोगितामा अझै धेरै खेल बाँकी छ । अहिले नै यस्तै हुनेछ भनेर भन्न सकिन्न ।‘

लिग तालिकाको शीर्षमा भने अहिलेसम्म अपराजित २ टिममध्ये एक एपीएफ रहेको छ । शनिबारै अर्को खेलमा एपीएफले आफ्नो स्थितिलाई अझ बलियो बनाउन भने सकेन । दिनको दोस्रो खेल पुलिस डर्बी रहेको थियो । यो रोमाञ्चक बराबरीमा टुंगिएको थियो । पुलिसले एपीएफलाई २–२ को बराबरीमा रोकेको हो । एपीएफले दुईपल्ट अग्रता लिएर पनि त्यसलाई कायम राख्न सकेन । यद्यपि एपीएफ ८ खेलबाट २० अंकसहित अंकतालिकाको शीर्षस्थानमा रह्यो । पुलिस भने ८ खेलबाट ८ अंकमै सीमित रह्यो । 

एपीएफले १० औं मिनेटमा प्रदीप लामाको गोलले अग्रता लिएको थियो । शिशिर चौधरीले २७ औं मिनेटमा बराबरी गोल फर्काए । प्रदीपले ६१ औं मिनेटमा एपीएफका लागि दोस्रो गोल गरे र यससँगै टिम दोस्रोपल्ट अगाडि रह्यो । ओशेन्द्र कटुवालले ८८ औं मिनेटमा पुलिसका लागि दोस्रो गोल गरेपछि खेल बराबरी टुंगियो । यसअघि राम्रो प्रदर्शनका लागि संघर्षरत पुलिसले एपीएफविरुद्ध आक्रामक भएर प्रस्तुत भएको थियो । 

पुलिसले पछिल्लो २ खेलमा ४ अंक बटुलेको छ । यो नै यस प्रतियोगितामा पुलिसको अहिलेसम्मको सबैभन्दा राम्रो प्रदर्शन हो । खेलपछि पुलिसका प्रशिक्षक चेतन घिमिरेले दाबी गरे, ‘पुलिस लयमा फर्केको छ ।’ उनको भनाइ थियो, ‘पछिल्लो खेलयता पुलिस लयमा फर्केको छ र यसले टिममा आत्मविश्वास बढेको छ । लिगको शीर्षस्थानमा रहेको टिमविरुद्ध अहिलेको बराबरी यसकै प्रमाण हो ।’ पुलिसले यसअघिको आफ्नो खेलमा नव जनजागृतिलाई ७ गोल गरेको थियो ।