काठमाडौँ — नेपाली फुटबल इतिहासकै उत्कृष्ट खेलाडी हुन्, सावित्रा भण्डारी ‘साम्बा’ । मैदानको प्रदर्शन र तथ्यांकले यस्तै भन्छ । यति बेला उनी गम्भीर चोटबाट गुज्रिरहेकी छन् । उनले चाहे जस्तो उपचार हुन सकेको छैन । यस्तोमा उनले सोमबार सामाजिक सञ्जालमा भावुक हुँदै लेखेकी छन्, ‘यो चोटले मलाई शारीरिक र मानसिक रूपमा थकाएको छ, तर मलाई विश्वास छ म फर्कने छु । थाकेको हो, हारेको छैन ।'

महिला राष्ट्रिय टोलीकी कप्तान पनि रहेकी सावित्राले आफूलाई लागेको चोट निको पार्न शल्यक्रिया आवश्यक परेको हुनाले त्यसमा आर्थिक सहयोग गर्न अपिल गरेकी छन् । उनले चोटग्रस्त घुँडाको शल्यक्रियाका लागि ८० हजार अमेरिकी डलर चाहिने पनि बताएकी छन् । उनी सात सातादेखि मैदान बाहिर छिन् । 

अस्ट्रेलियाको ‘ए’ लिगमा वेलिङ्टन फिनिक्सबाट खेल्ने क्रममा उनलाई चोट लागेको हो । ब्रिसवेन रोअर्सविरुद्धको खेलमा उनको एसीएल च्यातिएको थियो । उनको यो घटना दोस्रो पटक भएको हो । उनले लेखेकी छन्, ‘मेरो घुँडाको एसीएलमा यसअघि शल्यक्रिया हरेर हालिएको ग्राफ्ट र एमसीएल दुवैमा गम्भीर चोट लागेको छ । यसका लागि मैले पुनः जटिल शल्यक्रिया गर्नुपर्ने अवस्था छ ।’ 

सावित्राले सामाजिक सञ्जाल मार्फत अखिल नेपाल फुटबल संघ (एन्फा) ले आफूलाई बेवास्ता गरेको आरोप पनि लगाएकी छिन् । उनले लेखेकी छन्, ‘यसपटक एन्फा नेतृत्वबाट वाचा गरेको सहयोग पनि पाइएन । चोट लागेको ३ सातापछि क्लबको पहलमा शल्यक्रिया मिति तोकिएको भए पनि एन्फाले आफ्नो तर्फबाट प्रयास गर्ने बतायो । तर त्यसअनुसार एन्फाबाट प्रक्रिया अगाडि बढेन । मैले पटक–पटक प्रयास गर्दा पनि उहाँहरूलाई सम्पर्क गर्न कठिन भयो ।’ 

न्युजिल्यान्डको क्लबले उनलाई उताकै स्थानीय अस्पतालमा उपचार गर्न तयार रहेको बताइरहेको छ । तर साम्बाको इच्छा हो, चोट गम्भीर रहेको हुनाले कतारको अस्पेटार अस्पतालमै उपचार गराउने । क्लबले बिमाबाट प्राप्त हुने रकम पनि उनको नाममा निकासा गरिदिने भइसकेको छ । उनी थप्छिन्, ‘तर त्यो रकम मेरो शल्यक्रिया र ७–८ महिनाको रिह्याबका लागि अपुग हुने हुनाले आम समर्थकमाझ सहयोग माग्न आइपुगेकी छु ।’ 

यसबीच एन्फाले सोमबार नै प्रेस विज्ञप्ति जारी गर्दै साम्बाको उपचारका लागि आवश्यक पहल गरिरहेको जनाएको छ । उनले सामाजिक सञ्जालमा लेखेपछि आफूहरूको गम्भीर ध्यानाकर्षण भएको बताउँदै उनी नेपाली फुटबलको गौरव भएको र एक धरोहर रहेको एन्फाले जनाएको छ । एन्फाले व्यावसायिक क्लब फुटबलमा कोही पनि खेलाडी घाइते भए निजको उपचारको जिम्मा सम्बन्धित क्लबकै हुने अन्तर्राष्ट्रिय प्रचलन रहेको जिकिर गर्दै कतार फुटबल संघसँग आवश्यक पहल र ताकेता गरिसकेको पनि बताएको छ ।