उदयपुर — गाईघाटस्थित थरुहट रंगशालामा शनिबार हुने एन्फा महिला फुटबल च्याम्पियनसिपको उपाधिका लागि त्रिभुवन आर्मी र एपीएफ क्लब प्रतिस्पर्धी छन् । फाइनलको पूर्वसन्ध्यामा शुक्रबार पत्रकार सम्मेलनमा दुवै टिमका प्रशिक्षक र कप्तानले आफूहरूले उपाधि हत्याउने दाबी गरेका छन् । 

आर्मीका प्रशिक्षक राजु तामाङले आर्मीले यसअघिका धेरै प्रतियोगितामा उपाधि जित्ने अवसर गुमाएकाले यसपालि ती सबै बिर्सेर शतप्रतिशत उपाधि जित्ने दाबी गरे । जितका लागि आफ्ना खोलडी शारीरिक र मानसिक दुवै हिसाबले तम्तयार रहेको उनले सुनाए । ‘हामीलाई जित पक्का गर्नु छ । यो उपाधि कुनै पनि हालतमा नगुमाउने हाम्रो रणनीति हो,’ उनले भने । 

यसपालि टिममा पूर्ण आत्मविश्वास भरिएको र फाइनलसम्म आइपुग्दाको प्रदर्शनले मनोबल उच्च रहकाले उपाधि आफूहरूको हुने आर्मीकी कप्तान सुनिताकुमारी चौधरीले दाबी गरिन् । 

एपीएफका प्रशिक्षक जीवेशकुमार पाण्डेले उपाधि लक्ष्यसहित सबै खाले तयारीमा पूर्ण रहेको बताए । उनले अहिलेसम्म सानदार प्रदर्शन र उच्च मनोबल देखाउन सफल आफ्नो टिमले उपाधि जित्ने गरी अगाडि बढिरहेको बताए । एपीएफकी कप्तान अनिता बस्नेतले टिमका एक–से–एक खेलाडीमा मनोबल उच्च रहेको र आर्मीको सामना गर्न तयार रहेको बताइन् । ‘हाम्रो टिमले उपाधि जित्छ भन्नेमा हामी ढुक्क छौं,’ उनले दाबी पेस गरिन् ।