सुनसरी — इटहरीको विश्वआदर्श कलेजले दोस्रो हिसान कोशी फुटबल च्याम्पियनसीपको उपाधि जितेको छ ।

उच्च शिक्षालय तथा माध्यमिक विद्यालय संघ हिसान कोसी प्रदेशको आयोजना तथा हिसान सुनसरीको संयोजनमा भएको प्रतियोगिताको फाइनलमा विश्वआदर्शले इटहरीकै सुस्मा गोदावरी कलेजलाई १–० गोल अन्तरले पराजित गर्दै उपाधि जितेको हो ।

इटहरी रंगशालामा सम्पन्न फाइनल खेलमा विश्वआदर्शलाई उपाधि जिताउन जेनिस खड्काले निर्णायक गोल गरे । विश्वआदर्शका उज्वल चौधरी उत्कृष्ट गोलकिपर, एल्सन श्रेष्ठ उत्कृष्ट डिफेण्डर घोषित भए । सुस्मा गोदावरीका शिव राई उत्कृष्ट फरवार्ड घोषित हुँदा समिर चौधरी प्रतियोगिताको सर्वोत्कृष्ट खेलाडी घोषित भए ।
बुधबारदेखि भएको प्रतियोगितामा हिसानको जिल्ला स्तरीय प्रतियोगितामा विजेता तथा उपविजेता बनेको झापा, मोरङ र सुनसरीका जम्मा ६ वटा शिक्षालय सहभागी थिए ।