उदयपुर — उदयपुरको थारुहट रंगशाला गाईघाटमा जारी एन्फा वुमेन्स च्याम्पियनमा आइतबार विभागीय टिम सशस्त्र प्रहरी (एपीएीफ)ले आरएस रिसोर्टलाई १९ गोलको फराकिलो गोल अन्तरले जित हात पारेको छ ।

आरएस रिसोर्टले खाता खोल्न समेत नसक्दा एपीएफले १९ गोल गरेको हो। पहिलो हाफमै एपीएफले सात गोल गर्यो ।

खेलको २३ मिनेटमा गोल गरेकी एपीएफसी जर्सी नम्बर १९ की रश्मी कुमारी घिसिंङले ३५ मिनेट र ४५ मिनेटमा थप दुई गोल गरी पहिलो हाफमै ह्याट्रिक गरिन् । उनले दोस्रो हाफमा ८ गोल थपेर टिमलाई ११ गोलको योगदान गरिन्। उनी नै खेलको म्यान अफ दि म्याच घोषित भइन्। 

एपीएफकी जर्सी नम्बर १५ का अनिता केसीले ७ मिनेटमा टिमकै लागि पहिलो गोल गरिन् ।  दोस्रो हाफको ५१ मिनेट र ७३ मिनेटमा गोल थपेर ह्याट्रिक चुमिन् ।

खेलको १० मिनेटमा जर्सी नम्बर ८ की सरु लिम्बुले गोल गरिन् । १९ मिनेटमा जर्सी नम्बर २१ की निशा थोकरले गोल गरिन् । ३१ मिनेटमा जर्सी नम्बर १२ की गिता राणाले गोल गरी हाफटाइम अगाडि टिमको ७ गोलमा योगदान गरिन् । ५० मिनेटमा जर्सी नम्बर २ कि मनमाया धमालले गोल गरिन् । ७० औं मिनेटमा जर्सी नम्बर १७ की हिमा रावतले गोल गरिन्। 

आजको खेलमा आरएस रिसोर्टले शून्यमै चित्त बुझाउनु पर्यो । उनीहरूले पाएको अवसर गोलमा परिणत गर्न सकेनन् । सोमबारको खेलमा त्रिभुवन आर्मी क्लब र न्युरोड टिम काठमाडौं आम्नेसाम्ने हुनेछन् । न्युरोड टिम गाईघाट फुटबल क्लबलाई जितेर आएको हो। 

हालसम्मको खेलबाट गाईघाट फुटबल क्लब, एफसी रियल, छहारी युथ क्लब र  आरएस रिसोर्ट बाहिरिएको छ । एनआरटी, नेपाल पुलिस, चर्च बोइज  र एपीएफ अगाडि बढेको छ । संकटा फुटबल क्लबले भने खेल्न बाँकी छ। संकटाले फागुन ५ गते चर्च ब्वाईजको सामना गर्नुपर्नेछ ।