मुम्बई — अन्तर्राष्ट्रिय क्रिकेट काउन्सिल (आईसीसी) ले पाकिस्तानी क्रिकेट बोर्डसँग भारतविरुद्ध ट्वान्टी ट्वान्टी विश्वकप २०२६ मा हुने खेलमा सहभागी हुने वातावरण तयार पार्न वार्ता सुरु गरेको छ ।

भारतीय मिडियाका अनुसार आईसीसी र पाकिस्तानी बोर्डका पदाधिकारीसँग दुबईमा कुराकानी भइरहेको छ र यसको उद्देश्य पाकिस्तानलाई भारतविरुद्धको खेल बहिस्कार गर्ने निर्णय फिर्ता गराउनु नै रहेको छ ।

आईसीसीले बंगलादेशलाई प्रतियोगिताबाट बाहिर राखेपछि त्यसको विरोधमा पाकिस्तानले फेब्रुवरी १५ मा कोलम्बोमा हुने भनिएको लिग चरणको खेल नखेल्ने घोषणा गरेको थियो ।

यसले भू राजनीतिको दबाबमा परेको प्रतियोगितामा अझ अन्योलता छाएको हो । पाकिस्तानी सरकारले भारतविरुद्धको खेल बहिस्कार गर्ने भनेर घोषणा गरेपछि बोर्डको तर्फबाट अहिलेसम्म आधिकारिक जानकारी आएको छैन् ।