काठमाडौँ — इनाचोपासा क्रिकेट क्लबले प्रधानमन्त्री कपको भक्तपुर जिल्ला छनोट क्रिकेट प्रतियोगिताको उपाधि जितेको छ ।

इनाचोपासाले आइतबार भएको लिगको अन्तिम खेलमा भक्तपुर म्युनिसिपल क्रिकेट एसोसिएसन (बीएमसी) लाई १ सय २१ रनले पराजित गर्‍यो ।

इनाचोपासाले समूह चरणको सबै ३ खेल जितेर विजेता बनेको हो । भक्तपुर क्रिकेट एक्सिलेन्स सेन्टर (सीईसी), बीएमसी र भक्तपुर क्रिकेट सेन्टर (बीसीसी) ले ३–३ खेल खेल्दै १ मा विजय हात पारे । 

ओपनर रिङजिन लामाको ९२ रनमा इनाचोपासाले पूरा ५० ओभर खेली सबै विकेट गुमाई ३ सय १३ रन बनायो । रिङजिनले ६९ बल खेली १४ चौका र ३ छक्का प्रहार गरे । विवेक यादवले ७१ बल खेली ५ चौका र १ छक्काका साथ ५४, सुवास खत्रीले २६ बल खेली ७ चौका प्रहार गरी ४६ र अनुप श्रेष्ठले ५३ बल खेली ७ चौका प्रहार गरी ४५ रन बनाए । बीएमसीका धीरेन्द्र बस्नेत, भूपेन्द्र आचार्य, आकाश गुप्ता र मनमोहन ठाकुरले २–२ विकेट लिए ।