मेलबर्न — कार्लोस अल्कारेजले नोभाक जोकोभिचलाई पराजित गर्दै आइतबार पहिलो पटक अस्ट्रेलियन ओपनको उपाधि जितेका छन् ।

यससँगै उनी करियर ग्रान्ड स्लाम पूरा गर्ने सबैभन्दा कान्छा खेलाडी बनेका छन् । अर्कोतर्फ सर्बियाली खेलाडी जोकोभिचको कीर्तिमान २५ औं ग्रान्ड स्लाम जित्ने सपना अधुरै रह्यो । 

सुस्त सुरुआतलाई ओझेलमा पार्दै स्पेनी खेलाडीले आफ्ना ३८ वर्षीय प्रतिद्वन्द्वीलाई २–६, ६–२, ६–३ र ७–५ ले पराजित गरे । रड लेभर एरेनामा प्राप्त यस सफलतापछि उनले जितेको ग्रान्ड स्लामको संख्या सात भएको छ र उनी विश्व टेनिसका निर्विवाद नम्बर १ खेलाडी पनि भएका छन् । आधुनिक टेनिसमा उनी चारै ग्रान्ड स्लाम जित्ने कान्छा खेलाडी पनि भएका हुन् । 

यसअघि उनले विम्बल्डन, फ्रेन्च ओपन र यूएस ओपन सबै दुई–दुईपल्ट जितेका थिए । भर्खर २२ वर्षका अल्कारेजले आफ्नै देशका राफेल नाडाललाई उछिनेर चार ग्रान्ड स्लाम जित्ने सबैभन्दा कान्छा खेलाडी बनेका हुन् । नाडालले यस्तै उपलब्धि २४ वर्षको उमेरमा हात पारेका थिए ।

यस्तै सात ग्रान्ड स्लाम सफलतापछि उनले यत्तिकै उपाधि जितेका जोन म्याकनरो र म्याट्स विलान्डरको बराबरी गरेका छन् । आन्द्रे आगासी, जिमी कोनर्स र इभान लेन्डलले जितेका आठ ग्रान्ड स्लाम जितको प्रदर्शनका लागि उनी एक उपाधिबाट पछाडि छन् । खेलपछि उनले भने, ‘मेलबर्नमा प्रत्येक वर्ष खेल्न आउन पाउनु पनि ठूलै उपलब्धि हो । मैले आफ्नो जिम्मेवारी पनि पूरा गरें, सबै चार ग्रान्ड स्लाम जितेर ।’

उनले थपे, ‘म सबैलाई धन्यवाद पनि दिन चाहन्छुं । सबैले मलाई कठिन समयमा साथ दिएका छन् ।’ उनले जोकोभिचको पनि खुलेर प्रशंसा गरे र भने, ‘सबैले अहिले मैले प्राप्त गरेको उपलब्धिबारे पनि चर्चा गर्न सक्छन् । तर जोकोभिचले अहिले पनि जे गरिरहेका छन्, त्यो सबैका लािग प्रेरणा हुनुपर्छ । यो प्रेरणा टेनिस खेलाडीका लागि मात्र होइन, सबै खेलका लागि खेलाडीकै लागि प्रेरणा हुनुपर्छ ।’