पोखरा — पोखरा रंगशालामा शनिबारदेखि सुरु हुने साफ यू–१९ महिला फुटबल च्याम्पियनसिपका लागि सहभागी चारवटै राष्ट्रले आफ्नो तयारी पूरा गरिसकेका छन् । दक्षिण एसियाली फुटबल महासंघ (साफ)को आयोजनामा हुन लागेको यो प्रतियोगिता सन् २०१९ मा सम्पन्न १३ औं दक्षिण एसियाली खेलकुद (साग) पछि पोखरा रंगशालामा आयोजना हुने पहिलो अन्तर्राष्ट्रिय फुटबल प्रतियोगिता हो ।

अखिल नेपाल फुटबल संघ (एन्फा)ले आयोजना गर्न लागेको यस प्रतियोगितामा नेपाल, भारत, बंगलादेश र भुटानको सहभागिता रहनेछ । शुक्रबार पोखरामा आयोजित प्रि–म्याच कन्फेरेन्समा चारवटै टोलीका प्रशिक्षक र कप्तानले आफ्ना टिम प्रतियोगिताका लागि पूर्ण तयारी अवस्थामा रहेको बताएका छन् ।

राउन्ड रोबिन लिग प्रणालीमा सञ्चालन हुने यस प्रतियोगितामा प्रत्येक टोलीले अन्य टोलीसँग एक–एक खेल खेल्नेछन् । लिग चरणपछि शीर्ष दुई टोलीबीच २४ माघमा फाइनल खेल हुनेछ । च्याम्पियनसिपको उद्घाटन खेल शनिबार दिउँसो १२ बजे बंगलादेश र भुटानबीच हुनेछ । शनिबार नै दिउँसो ३ बजे आयोजक नेपालले भारतसँग खेल्नेछ । लिग चरणका बाँकी खेलहरू १९ देखि २१ माघसम्म सञ्चालन हुनेछन् । प्रत्येक दिन दुई–दुई खेल हुनेछन् । दर्शकको सहजताका लागि एन्फाले सामान्य प्यारापिटमा २ सय रुपैयाँ र भीआईपी प्यारापिटमा ५ सय रुपैयाँको टिकट मूल्य निर्धारण गरेको छ ।

घरेलु मैदानमा आयोजना हुने यस च्याम्पियनसिपमा उत्कृष्ट प्रदर्शन गर्ने लक्ष्य नेपाली टोलीका मुख्य प्रशिक्षक सुमन श्रेष्ठले राखेका छन् । ‘खेलाडीले प्रशिक्षणका क्रममा धेरै सुधार गरेका छन्,’ शुक्रबार पोखरामा आयोजित पत्रकार सम्मेलनमा उनले भने, ‘हाम्रो लक्ष्य उपाधि घरमै राख्ने छ ।’

तयारीको अवधि छोटो भए पनि राम्रो तयारी भएको उनको भनाइ छ । काठमाडौंमा प्राकृतिक मैदानमै प्रशिक्षण गरेकाले पोखराको मैदानमा समस्या नहुने उनको आकलन छ । प्रतियोगितामा सहभागी सबै टिम बलियो भए पनि भारतलाई मुख्य प्रतिस्पर्धीका रूपमा हेरेको उनले बताए । ‘पहिलो म्याच राम्रो भयो भने अरू म्याच राम्रो हुन्छ । यसभन्दा अगाडि जस्तो रिजल्ट आए पनि यसपल्ट फरक रिजल्ट ल्याउन कोशिष गर्नेछौं,’ उनले भने, ‘धेरैजसो यू–१७ का खेलाडी लिएर खेलेका छौं । सबै खेलाडी सकारात्मक माइन्डसेटमा छन् ।’

कप्तान सुशीला केसीले घरेलु मैदानमा प्रतियोगिता हुनु नेपालका लागि फाइदाजनक भएको बताइन् । ‘घरेलु मैदानमा हुनु हाम्रा लागि प्लस प्वाइन्ट हो । यसपल्ट राम्रो रिजल्ट लिएर आउने आश लिएर अगाडि बढेका छौं,’ उनले भनिन्, ‘छोटो समयमा पनि हामीले धेरै कुरामा सुधार गरेका छौं । खेलाडीहरू कडा परिश्रमी र उत्प्रेरित छन् ।’

एन्फाले गत पुसमा महिला यू–१९ टोलीको मुख्य प्रशिक्षकको जिम्मेवारी सुमन श्रेष्ठलाई दिएको थियो । घरेलु फुटबलका अनुभवी प्रशिक्षक सुमनले पछिल्लो समय ‘ए’ डिभिजन लिग च्याम्पियन चर्च ब्वाइज युनाइटेडको प्रशिक्षण सम्हालेका थिए । यसअघि उनले मनाङ मर्स्याङ्दी, हिमालयन शेर्पा, नेपाल सुपर लिग (एनएसएल) फ्रेन्चाइजी पोखरा थन्डर्स र भुटानी क्लब फुएन्सोलिङ हिरोज एफसीलाई प्रशिक्षण दिएको अनुभव राख्छन् ।

उनको नेतृत्वमा टोलीले तीन साता काठमाडौंमै प्रशिक्षण गर्‍यो । उनले नेपाली टोली निर्माण गर्ने क्रममा यू–१७ का अनुभवी खेलाडी समावेश गरेका छन् । गत संस्करणमा सहभागी सुशीला केसी, सेनु परियार, माया मास्के र वर्षा ओलीले यसपल्ट पनि खेल्नेछन् । यी चारजना नेपाली टोलीमा सर्वाधिक अनुभवी खेलाडी हुन् जसले नियमित रूपमा राष्ट्रिय उमेर समूहबाट खेलिरहेका छन् ।

नेपाली महिला फुटबलको उमेर समूहमा हालसम्म कुनै पनि अन्तर्राष्ट्रिय उपाधि जित्न नसकेको इतिहास बदल्ने लक्ष्यका साथ नेपाली यू–१९ टोली शनिबारदेखि घरेलु मैदानमा उत्रिँदैछ । यो संस्करण नेपालका लागि आफ्नो बिर्सनलायक इतिहास सुधार्ने महत्त्वपूर्ण अवसर बनेको छ ।

यसअघि तीनपल्ट फाइनलसम्मको यात्रा तय गरे पनि नेपाल तीनैपल्ट उपविजेतामा खुम्चिएको थियो । विशेष गरी सन् २०१८ र २०२३ को फाइनलमा नेपाल बंगलादेशसँग पराजित हुँदा उपाधिबाट विमुख भएको थियो । दक्षिण एसियाली क्षेत्रमा बंगलादेश सर्वाधिक सफल टोली हो, जसले पाँचपल्ट उपाधि जितेको छ भने भारतले दुईपल्ट उपाधि चुमेको छ ।

घरेलु मैदान र सीमित टोलीको फाइदा

यसपल्ट प्रतियोगितामा नेपालसहित भारत, बंगलादेश र भुटान गरी चार राष्ट्र मात्र सहभागी छन् । श्रीलंका, पाकिस्तान र माल्दिभ्सले आन्तरिक कारण देखाउँदै सहभागिता नजनाएपछि नेपाललाई उपाधि जित्न केही सहज हुने अनुमान गरिएको छ । यद्यपि, बलिया प्रतिद्वन्द्वी भारत र बंगलादेशलाई पाखा लगाउनु नेपालका लागि मुख्य चुनौती हुनेछ ।

साफका महासचिव पुरुषोत्तम कट्टेलले भने, ‘नियमअनुसार सातै राष्ट्रले भाग लिनुपर्ने हो तर तीन राष्ट्रले आन्तरिक समस्या देखाउँदै नाम फिर्ता लिए । यद्यपि, यसले प्रतियोगिताको प्रतिस्पर्धात्मकतामा खासै असर गर्ने छैन ।’

काठमाडौंमा राष्ट्रिय लिग फुटबल चलिरहेका कारण दशरथ रंगशाला उपलब्ध नभएपछि एन्फाले यो प्रतियोगिता पोखरामा सारेको हो । एन्फाका प्रमुख कार्यकारी अधिकृत इन्द्रमान तुलाधरले पोखरालाई अन्तर्राष्ट्रिय फुटबलको ‘हब’ बनाउने लक्ष्यका साथ अघि बढेको बताए । जिल्ला खेलकुद विकास समितिका अध्यक्ष मिलन गुरुङले घरेलु टोलीलाई समर्थन गर्न देशभरका फुटबलप्रेमी पोखरा आउने विश्वास व्यक्त गरे ।

एन्फाका प्रवक्ता सुरेश शाहले तयारीबारे जानकारी दिँदै भने, ‘सबै तयारी पूरा भइसकेको छ । सहभागी टोलीको प्रशिक्षणका लागि लामाचौरस्थित गोस्ते खेलमैदान व्यवस्था गरिएको छ ।’ यो प्रतियोगिता सम्पन्न गर्न आयोजकले करिब २ करोड ४५ लाख १५ हजार २९० रुपैयाँ खर्च लाग्ने अनुमान गरेको छ ।

यसपल्ट प्रतियोगिता ‘सिंगल राउन्ड रोबिन’ लिगका आधारमा सञ्चालन हुँदैछ । ६ खेलपछि तालिकाको शीर्ष दुई टोलीले उपाधिका लागि फाइनलमा प्रतिस्पर्धा गर्नेछन् ।

प्रतिद्वन्द्वी टोलीले पनि पोखरामा बलियो प्रदर्शन गर्ने दाबी गरेका छन् । बंगलादेशका प्रशिक्षक पिटर बटलर र कप्तान अर्पिता विश्वासले यो प्रतियोगितालाई नयाँ खेलाडीका लागि ठूलो एक्सपोजरका रूपमा लिएका छन् । भारतकी प्रशिक्षक पामेला कोन्टीले टोलीमा अधिकांश १७ वर्षमुनिका खेलाडी भए पनि टोली सन्तुलित र मजबुत रहेको बताइन् । भुटानकी प्रशिक्षक टंका माया घल्लीले तयारीबाट आफू सन्तुष्ट रहेको र टोली उत्साहित रहेको उल्लेख गरिन् ।