पेरिस — लिभरपुल, म्यानचेस्टर सिटी र बार्सिलोनाले बुधबार युरोपेली च्याम्पियन्स लिग फुटबलको अन्तिम १६ मा सिधै प्रवेश पाएका छन् । 

डिफेन्डिङ च्याम्पियन पेरिस सेन्ट जर्मेन (पीएसजी) र रियल म्याड्रिड भने शीर्ष आठमा रहन असफल रहे । इंग्लिस प्रिमियर लिग च्याम्पियन लिभरपुलले कोराबागलाई एनफिल्डमा ६–० ले हरायो । टोली ३६ टिमसम्मिलित प्रतियोगिताको तेस्रो स्थानमा रहेको छ । शीर्ष दुईमा रहेका आर्सनल र बायर्न म्युनिख यसअघि नै अन्तिम १६ मा पुगिसकेका छन् ।

आर्सनलले किराट अल्माटीलाई ३–२ र बायर्नले आइन्डहोभनलाई २–१ ले हराए । टोटनहम, बार्सिलोना, चेल्सी, स्पोर्टिङ लिस्बन र सिटी शीर्ष आठमा रहेका छन् । पीएसजी भने न्युकासल युनाइटेडको हातबाट १–१ को बराबरीमा रोकिएपछि प्लेअफ खेल्नुपर्ने अवस्थामा पुगेको हो । कीर्तिमान १५ पल्टको विजेता रियलले पनि प्लेअफ खेल्नुपर्नेछ । यसको कारण रह्यो, पूर्व प्रशिक्षक जोसे मोउरिन्होको नेतृत्वमा रहेको बेन्फिकासँग ४–२ को हार । 

यो खेल आफैंमा नाटकीय रह्यो, किनभने खेलको ९८ औं मिनेटमा बेन्फिका गोलरक्षक एनाटोली टुरबिनले एक गोल गरेका थिए । 

एनफिल्डमा भएको खेलमा लिभरपुलका लागि एलेक्स म्याक एलिस्टरले गोलको खाता खोलेपछि फ्लोरिन विर्टजले दोस्रो गोल थपेका थिए । त्यसपछि मोहम्मद सलाह र ह्युगो एकिटिकेले एक–एक गोल थपेका थिए । एलिस्टरको दोस्रो व्यक्तिगत गोलपछि अन्तिम गोल फेडेरिको सिसाले छैटौं गोल गरे । खेलपछि एलिस्टरले भने, ‘लिभरपुल यस्तो जितका लागि हकदार छ । हामी यस्तो प्रदर्शन दिन सक्षम पनि छौं ।’