काठमाडौँ — महिला ट्वान्टी–२० विश्वकप ग्लोबल छनोटमा सोमबार आमनेसामने हुँदा नेपाल र स्कटल्यान्डबीचमा एउटा समानता हुनेछ ।

दुबै टोली एक अर्काका बारेमा अपरिचित जस्तै छन् । नेपाल र स्कटल्यान्ड एकआपसमा पहिलो पटक भिड्न लागेका हुन् । प्रतियोगिता सुरु हुनुअघिको अभ्यास खेलमा यी दुई टोली नखेलेका भने होइनन् । 

तर दुवै टोलीलाई थाहा छ, यस खेलले अघिल्लो चरणको दिशा कोर्नेछ । सुपर सिक्समा पुग्न नेपाललाई स्कटल्यान्डमाथि विजय हात पारेर नपुग पनि हुन सक्छ । त्यसैले नेपाल स्कटल्यान्डलाई ठूलो अन्तरले पराजित गर्ने दाउमा रहेको छ । विश्वकपकै अनुभव बोकिसकेको स्कटल्यान्डलाई पराजित गर्न नेपाललाई त्यत्ति सजिलो हुने छैन । 

पूर्ण राष्ट्र जिम्बावेमाथि शनिबार ६ विकेटको विजय हात पारेपछि नेपालको सुपर सिक्समा पुग्ने समीकरण ब्युँतिएको हो । पूजा महतोले अविजित ५२ रन बनाएपछि नेपालले जिम्बावेसँगको खेलमा १ सय ३० रनको विजय लक्ष्य पछ्याएको थियो । आत्मविश्वासी पूजाले खेलपछि भनेकी थिइन्, ‘अघिल्ला खेलहरूमा नेपाल १ सय ४० रनको लक्ष्यनजिक पुगेको थियो, १ सय ३० त केही होइन ।’

नेपाल पहिलो दुई खेलमा थाइल्यान्डसँग ८ विकेटले र नेदरल्यान्ड्ससँग २ रनले पराजित भएको थियो । नेदरल्यान्ड्ससँग १ सय ४१ रनको लक्ष्य पछ्याउँदा अन्तिम समयमा चुकेको थियो । सम्झना खड्का र विन्दु रावलले उत्कृष्ट सुरुआत दिलाए पनि मध्यक्रमका ब्याटरहरू एकपछि अर्को आउट हुँदा नेपालले मौका चुकाउनुपरेको थियो । तर जिम्बावेसँगको खेलमा पूजा र कप्तान इन्दु बर्माले त्यही मध्यक्रमलाई नियन्त्रणमा लिँदै नेपाललाई एतिहासिक विजय दिलाएको थियो । 

नेपाललाई पराजित गरेमा स्कटल्यान्डको सुपर सिक्स यात्रा सुनिश्चित हुनेछ । समूह ‘बी’ आयरल्यान्डले सबै ३ खेल जितेर सुपर सिक्समा पुगिसकेको छ । स्कटल्यान्ड र थाइल्यान्ड ३ खेलमा समान २ जित हात पारी क्रमशः दोस्रो र तेस्रो स्थानमा छन् । नेपालको ३ खेलमा २ अंक छ । जिम्बावे सबै खेल हारेर घर फर्किसकेको छ । 

सोमबार नै यस समूहको अर्को खेलमा नेदरल्यान्ड्स र थाइल्यान्डका बीच प्रतिस्पर्धा हुनेछ । नेपालले स्कटल्यान्डलाई पराजित गर्न सकेमा यस खेलको नतिजाले पनि नेपालको अर्को चरणमा जाने सम्भावनालाई प्रभाव पार्नेछ । पहिलो ३ खेल जितेर यसअघि नै नेदरल्यान्ड्स सुपर सिक्समा पुगिसकेको छ । नेपालले स्कटल्यान्डलाई र नेदरल्यान्ड्सले थाइल्यान्डलाई पराजित गरेको खण्डमा नेपालसहित स्कटल्यान्ड र थाइल्यान्डको समान ४ अंक हुनेछ र यस्तोमा राम्रो रन रेट भएको दुई टोली सुपर सिक्समा पुग्नेछ । 

पहिलो खेलमा नेदरल्यान्ड्ससँग ७ रनले पराजित स्कटल्यान्डले त्यसपछि जिम्बावे र थाइल्यान्डलाई समान ५ विकेटले पराजित गरेको थियो । पहिलो पटक महिला ट्वान्टी–२० विश्वकप ग्लोबल छनोटमा खेल्दै नेपालले जिम्बावेमाथि विजय हात पार्न सकेको थियो । स्कटल्यान्डले भने २०२४ को ट्वान्टी–२० विश्वकप नै खलिसकेको छ ।